თბილისის სააპელაციო სასამართლომ დღეს ღამის კლუბ „ბასიანის“ ინციდენტზე ბრალდებულ პირს აღკვეთის ღონისძიების სახით ორთვიანი წინასწარი პატიმრობა შეუფარდა. აღნიშნულთან დაკავშირებით სასამართლო განცხადებას ავრცელებს:

„თბილისის სააპელაციო სასამართლოს საგამოძიებო კოლეგიის 2018 წლის 17 იანვრის განჩინებით, დაკმაყოფილდა ქ. თბილისის დიდუბე-ჩუღურეთის რაიონული პროკურატურის საჩივარი, გაუქმდა თბილისის საქალაქო სასამართლოს სისხლის სამართლოს საქმეთა საგამოძიებო, წინასასამართლო სხდომისა და არსებითი განხილვის კოლეგიის, 2018 წლის 15 იანვრის განჩინება და ბრალდებულ თ.ქ.-სთვის, შეფარდებული აღკვეთი ღონისძიება გირაო 30 000 ლარის ოდენობით, შეიცვალა აღკვეთი ღონისძიებით პატიმრობით. ბრალდებულ თ. ქ.-ს ბრალად ედება 13 იანვარს კლუბ “ბასიანში” დაცვის ორი წევრის დაჭრა და პოლიციის მუშაკის კანონიერი მოთხოვნისადმი დაუმორჩილებლობა, რომლის დროსაც პოლიციის თანამშრომელმა მიიღო ხელის ნაკვეთი ჭრილობა“, - ნათქვამია განცხადებაში.