ღამის კლუბ „ბასიანის“ ინციდენტში ბრალდებულ თამაზ ქვლივიშვილს სააპელაციო სასამართლომ აღკვეთის ღონისძიების სახით წინასწარი პატიმრობა შეუფარდა. განაჩენის გამოცხადების შემდეგ, ბრალდებულის ადვოკატმა ჟურნალისტებთან საუბრისას აღნიშნა, რომ სასამართლომ ზეწოლას ვერ გაუძლო:

„მათ დაზიანების ხარისხის განმსაზღვრელი არანაირი დოკუმენტი არ ჰქონიათ, არც ექსპერტიზის დასკვნა. ერთადერთი ვარაუდი იყო ის, რომ ექიმმა მისცა ჩვენება, თითქოსდა თუ არ მოხდებოდა დროული ჩარევა, ის გარდაიცვლებოდა. ამ ლოგიკით თუ ვიმსჯელებთ, შესაძლოა, წარედგინათ მკვლელობის მცდელობაც. მე აქამდე ვიკავებდი თავს, მაგრამ ახლა გავაჟღერებ – დაცვის თანამშრომელმა ფეხქვეშ გაიგდო ჩემი დაცვის ქვეშ მყოფი და სცემდა. შსს მინისტრმა აბსოლუტურად კანონიერი და სწორი განცხადება გააკეთა. ბრალდებულმა არათუ არ იცოდა, რომ ის პოლიციელი იყო, და არც არანაირი განზრახვა არ ჰქონდა, რომ ვინმესთვის მიეყენებინა დაზიანება. ეს იყო მხოლოდ და მხოლოდ გაშველების დროს მიღებული დაზიანებები და რა გახდა ამ გაშველების მიზეზი, ამის მტკიცებულებებს ჩვენ მოვიპოვებთ. დღევანდელი გადაწყვეტილება არის პოლიტიკური გადაწყვეტილება, მოსამართლემ ვერ გაუძლო ზეწოლას, ვბრუნდებით ისევ და ისევ იმ პერიოდში, როდესაც გარედან ხდებოდა გადაწყვეტილების მიღება. მე არ ვიცი, რისი შეეშინდა ატეხილი აჟიოტაჟის თუ სხვა რამის , ეს იყო არაკანონიერი და უსაფუძვლო გადაწყვეტილება, რომელიც სამწუხაროდ, არ საჩივრდება“, – განაცხადა მესხმა.