გენერალ სოსო ქუთათელაძის მკვლელობის საქმეზე ერთი პირის დაკავებას ადვოკატი ადასტურებს

სამართალი - 12:32, 17 Jan, 2018

2453

ადვოკატი ალექსანდრე კობაიძე „ნიუპოსტთან“ ადასტურებს, რომ გენერალ სოსო ქუთათელაძის მკვლელობის საქმეზე ერთი პირია დაკავებული. იურისტი ამ ეტაპზე ბრალდებულის ვინაობას არ ასახელებს. მისი თქმით, დაკავებულს ბრალი სსკ-ის 236 მუხლის მეორე ნაწილით, ცეცხლსასროლი იარაღის უკანონოდ შეძენა-შენახვა წაუყენეს.

კობაიძე ამბობს, რომ დაკავებულის ბინიდან იარაღის ტყვიებია ამოღებული, რაც ადვოკატის მტკიცებით, ბრალდებულის მამას ეკუთვნოდა და ქუთათელაძის მკვლელობასთან ამ ვაზნებს კავშირი არ აქვს.

„მკლელობასთან კავშირში არ არის, ვაზნები მამას ეკუთვნოდა, არსებობს გამოკითხვის ოქმი, თუმცა მაინც იარაღის შეძენა-შენახვის მუხლთ წაუყენეს ბრალი,“ - აცხადებს ადვოკატი.

ამასთან როგორც ცნობილია, მკვლელობის საქმეზე დაკითხვაზე ე.წ. სტამბოლის ბაზრის დირექტორი, მამუკა ცხოვრებაძე იმყოფება, რომელმაც მკვლელობის ღამეს განაცხადა, რომ მან ნახა პირველად მოკლული ქუთათელაძე საკუთარ კაბინეტში.

არსებული ინფორმაციით, მკვლელმა იცოდა, რომ მიმდებარე ტერიტორიაზე დამონტაჟებული კამერები არ მუშაობდა და მკვლელობის შემდეგ, შემთხვევის ადგილი სათადარიგო კარით დატოვა.

სამართალდამცველებმა ე.წ. სტამბოლის ბაზრის მოვაჭრეები დაკითხეს.