გატაცებაში ბრალდებული პავლე გოცირიძის საქმე - შსს პოლიციელთა მხრიდან ზეწოლის ფაქტს უარყოფს და მტკიცებულებებზე საუბრობს

სამართალი - 21:19, 12 Jan, 2018

4775

2 წლის განმავლობაში ორ სხვადასხვა დანაშაულში გამართლებულ პავლე გოცირიძეს, რომელიც ამჯერად გატაცებასა და გამოძალვის მცდელობაშია ბრალდებული, სასამართლომ წინასწარი პატიმრობა უკვე შეუფარდა. მთავარი მოწმე საქმეში პავლე გოცირიძის ბავშვობის მეგობარია, რომელიც პოლიციას ფსიქოლოგიურ და ფიზიკურ ზეწოლაში ადანაშაულებს. ზაზა ჩალაძის განცხადებას, რომელიც პოლიციის ერთერთ თანამშრომელს ადანაშაულებს, შს სამინისტრო ეხმაურება. უწყებაში აცხადებენ, რომ მცდარია ინფორმაცია, თითქოს დაზარალებულს რაიმე სახის კავშირი აქვს მასთან, ასევე ადგილი არ ჰქონია მოწმეზე ფსიქოლოგიურ ან ფიზიკურ ზეწოლის ფაქტს. ,,შეთხვევას ჰყავს რამდენიმე მოწმე, რომლებიც გამოძიების პროცესში დაიკითხნენ. საქმეში არსებობს სხვა მტკიცებულებებიც, რომლებიც ადასტურებენ დაკავებულების ბრალეულობას. საქმეზე გრძელდება გამოძიება“ - განაცხადა შსს-ის ცენტრალური კრიმინალური დეპარტამენტის დირექტორის მოადგილემ დავით ლაცაბიძემ.

გოცირიძე მეგობრებთან ერთად სამართალდამცველებმა ორი დღის წინ ქარელის მამათა მონასტერში მიმავალი, გორის გზაზე დაიჭირეს. გამოძიება მათ გამოძალვის მცდელობას ედავება, თუმცა დაკავებულები ბრალს არ აღიარებენ.