შეიძლებოდა თუ არა მაჩალიკაშვილის გადარჩენა - „დროის ფაქტორს დიდი მნიშვნელობა აქვს“

სამართალი - 09:42, 11 Jan, 2018

2580

პანკისის ხეობაში, სპეცოპერაციისას მოკლულ 19 წლის თემირლან მაჩალიკაშვილს დუისში დღეს დაკრძალავენ.

ოჯახი მაჩალიკაშვილის საზღვარგარეთ ტრანსპორტირებას ელოდებოდა, თუმცა ახალგაზრდას გული 4 ჯერ გაუჩერდა და გუშინ, გამთენიისას გარდაიცვალა.

მაჩალიკაშვილის მშობლები სამართალდამცველების მხრიდან ძალის გადამეტებასა და გამოძიების არასწორ მიმდინარეობაზე საუბრობენ. მეტიც, ლიკვიდირებულის დედა დარწუნებულია, რომ მისი შვილი „აპარატიდან გამორთეს“.

ოჯახი საკუთარი სიმართლის დამტკიცებას საქართველოს საზღვრებს გარეთ შეეცდება. მათი თქმით, თემირლან მაჩალიკაშვილს კრიმინალთან და იარაღთან კავშირი არ ჰქონია და ამის მტკიცებულება არც შესაბამის ორგანოებს აქვთ. მშობლები მის ჩატაევთან კავშირსაც აბსურდად მიიჩნევენ.

სწორედ სტრასბურგში დავის დაწყების გამო დათანხმდნან მაჩალიკაშვილის მშობლები ექსპერტიზას, რომელიც ცხედარს გუშინ ჩაუტარდა.

დამოუკიდებელმა ექსპერტმა მაია ნიკოლეიშვილმა თემირლან მაჩალიკაშვილის ცხედრისთვის ექსპერტიზის ჩატარების შემდეგ, თქვა, რომ ექსპერტიზის დასკვნის ვადები საკმაოდ ხანგრძლივი იქნება.

ექსპერტი აღნიშნავს, რომ მაჩალიკაშვილის საქმეში მასთან ერთად ბალისტიკური ექსპერტი აუცილებლად უნდა ჩაერთოს.

მისი თქმით, გამოძიებას მათთვის ერთ-ერთი ყველაზე მთავარი ინფორმაცია არ მიუწოდებია. კერძოდ, ბრალდების მხარეს ექსპერტისთვის ამ დრომდე არ უჩვენებია ადგილი, სადაც ტყვიამ თემირლან მაჩალიკაშვილის საწოლი ოთახის კედელზე მოძრაობა დაასრულა.

ნიკოლეიშვილის განმარტებით, ამ წერტილის გადმოცემით დადგინდება მსროლელის მდგომარეობა და განისაზღვრება სროლის ტრაექტორია.

“საწოლში მყოფზე რომ მოხდა ამ დაზიანების მიყენება ეს ფაქტია. მაჩალიკაშვილის პოზა ჩვენ ვიცით, მაგრამ მსროლელის პოზის აღსადგენად იქნება ეს ტრაექტორია საჭირო. გამოძიებამ უნდა მოგცეს ის ინფორმაცია, სად იყო ბოლო წერტილი. მარტო ჩემი სამედიცინო ექსპერტის კომპენეტცია ბოლომდე არ იქნება. აქ ბალისტის და სამედიცინო ექსპერტის მონაწილეობა ერთდროულად აუცილებელი იქნება,“-აცხადებს მაია ნიკოლეიშვილი.

ექსპერტი თემირლან მაჩალიკაშვილის სხეულში აღმოჩენილ უცხო სხეულის შესახებ საუბრობს.

მილიმეტრნახევრიანი უცხო სხეული გამოკვლევებისთვის უკვე გადაიგზავნა.

"გამოკვლევა ჩატარდა რაც შეიძლება საფუძვლიანად. საკმაოდ დიდი დრო დასჭირდა ერთ-ერთ რენტგენოკონტრასტული უცხო სხეულის ძებნას, მაგრამ ამოვიღეთ და დამატებითი ლაბორატორიული გამოკვლევისთვის გაიგზავნება. ეს არის უცხო სხეული, ასე წერია კომპიუტერულ ტომოგრაფიებზეც. არის მოყავისფრო და ძალიან მცირე ზომის, მაგრამ ეს არის მეტალი თუ სხვა რამ, უფრო ლაბორატორიაში უნდა გამოიკვლიონ", - განაცხადა მაია ნიკოლეიშვილმა.

საქმეში ოჯახის თხოვნით ჩართული ექსპერტი ამბობს, რომ ექსპერტიზის მიმდინარეობის ფოტოგადაღება პირადად უზრუბველყო.

ნიკოეიშვილს ამ ეტაპზე უჭირს საუბარი დაგვიანდა თუ არა მაჩალიკაშვილისთვის დროული ქირურგიული დახმარების აღმოჩენა.

„დროის ფაქტორს დიდი მნიშვნელობა აქვს“ - ამბობს ექსპერტი, თუმცა ნიკოლეიშვილი იქვე აღნიშნავს რომ არ იზიარებს მოსაზრებას, რომ შეგნებულად დაგვიანდა მაჩალიკაშვილისთვის პირველადი ქირურგიული ჩარევა.

„დროული ქირურგიული დახმარება გადარჩენის შანსს ყოველთვის ზრდის. რამდენად გაიზრდებოდა ეს შანსი, ამას ვერ გეტყვით, რადგან ჩვენ ვნახეთ ორი კვირის შემდგომი დაზიანება, რომელიც საკმაოდ სახეშეცვლილია, გაფართოებულია და ა.შ...“- დასძინა მაია ნიკოლეიშვილმა.