მკვლელობა ხორავაზე - ბრალდებულების წინასასამართლო სხდომა დღეს გაიმართება

სამართალი - 09:51, 09 Jan, 2018

2335

თბილისის საქალაქო სასამართლოში არასრულწლოვნების მკვლელობის საქმეში ბრალდებულების წინასასამართლო სხდომა დღეს 15:00 საათზეა დაიწყება.

სხდომა დახურული იქნება, სასამართლოზე მტკიცებულებების დასაშვებობაზე იმსჯელებენ,

დღესვე სასამართლო ბრალდებულებისთვის შეფარდებულ აღკვეთის ღონისძიებასაც გადასინჯავს. დაცვის მხარე არასრულწლოვნების მიმართ გამოყენებული პატიმრობის, არასაპატიმრო ღონისძიებით შეცვლის შუამდგომლობას დაყენებას და გირაოს შეთავაზებას აპირებს.

„მიგვაჩნია, რომ გამოძიება არ არის სრულყოფილად ჩატარებული, ბევრი უმნიშვნელოვანესი დეტალი არის გაურკვეველი, საზოგადოებას აწუხებს ბევრი ისეთი შეკითხვა, რომელზეც ბრალდების მხარე პასუხს ვერ სცემს." - განაცხადა ადვოკატმა ტარიელ კაკაბაძემ

მეორე არასრულწლოვნის ადვოკატის ინფორმაციით, მისი დაცვის ქვეშ მყოფი ამ დრომდე დუმილის უფლებას იტოვებს. დაცვის მხარე სხდომაზე მოითხოვს, ბრალდების მიერ წარმოდგენილი მტკიცებულებები სადავო გახდეს.

„მტკიცებულებებს წარვადგენთ. ბრალდების მხარეც და დაცვის მხარეც. შემდეგ ვიმსჯელეთ დასაშვებობაზე, სადავოობაზე. ამის შემდეგ აღკვეთის ღონისძიების შეცვლის საკითხის განხილვა იქნება. ბოლოს უკვე საქმის არსებითი განხილვისთვის გადაცემაზე ვიმსჯელებთ. ეს არის ძაან დიდი საქმე და დიდი დრო დასჭირდებათ მხარეებს პოზიციების ჩამოსაყალიბებლად. ჩემი დაცვის ქვეშ მყოფი ისევ დუმილის უფლებას იტოვებს. სავარაუდოდ ბოლომდე ასე იქნება. სადავოდ გავხდი ბრალდების მტკიცებულებებს“, – აცხადებს ვახტანგ აბესაძე.

ხორავას ქუჩაზე არასრულწლოვნების მკვლელობის საქმეზე პასუხისგებაშია მიცემულ შვიდი პირი. მათგან ორ არასრულწლოვანს ბრალად ედება განზრახ მკვლელობა ჯგუფურად, დანარჩენებს კი დანაშაულის შეუტყობინებლობა. დანაშაულის დაფარვის ბრალდებით დაკავებულია სამი პირი.