"რატომ უნდა ვაგო პასუხი იმაზე, რაც არ ჩამიდენია?"

"რატომ უნდა ვაგო პასუხი იმაზე, რაც არ ჩამიდენია?" - ირაკლი ჩხვირკია

სამართალი - 17:20, 08 Jan, 2018

2225

11 - 12 მარტის ბათუმის აქციის ორგანიზებაში ბრალდებულთა სასამართლო პროცესზე დღეს დასკვნითი სიტყვით ბრალდებული ირაკლი ჩხვირკია წარსდგა. ირაკლი ჩხვირკია აცხადებს, რომ ის წარდგენილ ბრალში უდანაშაულოა:

"რატომ უნდა ვაგო პასუხი იმაზე რაც არ ჩამიდენია ან ის ზარალი რატომ უნდა ავინაზღაურო, რაც ამ აქციის შედეგად მიადგა სახელწიფოს? ვერცერთ ეტაპზე პროკურატურამ ვერ მოიტანა მტკიცებულება, რომელიც დაადასტურებს, რომ რაიმე ტიპის დანაშაული ჩავიდინე. ყველა მანქანა ჩემს ჩამოსვლამდე დაიწვა. ამ საქმეზე 19 დაკავებულის ჩვენებებში ამბობენ, რომ არ იციან ვინ ჰყავდა ორგანიზატორი ამ აქციას, მხოლოდ მერაბ მურვანიძე მადებს ხელს და ამ ერთი მოწმის ჩვენებით უნდა მცნოთ დამნაშავედ?" - განაცხადა ირაკლი ჩხვირკია.

დასკვნით სიტყვაში ბრალდებულმა დედასაც მიმართა: "დედას ვთხოვ ნუ იქნება ემოციური რა გადაწყვეტილებაც არ უნდა გამოიტანოს მოსამართლემ".

ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.

ვრცელდებოდა ინფორმაცია, რომ განაჩენი დღეს უნდა გამოცხადებულიყო, თუმცა დღევანდელ სხდომაზე ცნობილი გახდა განაჩენი 10 იანვარს, 10:30 საათზე გამოაცხადდება.