საქართველოს მესამე პრეზიდენტს სანდრო გირგვლიანის საქმეზე სასამართლომ გამამტყუნებელი განაჩენი გამოუტანა და სამი წლით თავისუფლების აღკვეთა მიუსაჯა. სამიქს პროკურორმა ჟურნალისტებთან საუბრისას აღნიშნა, რომ ბრალდების მხარეს ჰქონდა მოლოდინი, რომ სასამართლო ამ საქმეზე გამამტყუნებელ განაჩენს გამოიტანდა:

„სტრასბურგის გადაწყვეტილება გახდა საფუძველი, რომ გირგვლიანის საქმეზე ჩატარებულიყო ხელახალი, ობიექტური გამოძიება. ამ გამოძიების შედეგების მიხედვით, დღეს უკვე გირგვლიანის საქმეზე რვა პირის მიმართ გამოტანილია გამამტყუნებელი განაჩენი. მათ შორის, პრეზიდენტ სააკაშვილის, იმჟამინდელი შს მინისტრის ივანე მერაბიშვილის, ყოფილი თავდაცვის მინისტრის ბაჩო ახალაიას და სხვა მაღალჩინოსნების მიმართ. ამ საქმეს აქვს ორი მხარე, ერთი რა თქმა უნდა, არის ადამიანური მხარე და სამწუხაროა, როდესაც ამ ქვეყნის, თუნდაც ყოფილი პრეზიდენტი სასამართლომ დღეს გამოაცხადა დამნაშავედ, მაგრამ არის მეორე სამართლებრივი მხარე. ეს საქმე უნდა გადაიქცეს პრევენციად იმისა, რომ მიუხედავად სახელმწიფო პოლიტიკური თანამდებობის პირების იერარქიული მდგომარეობისა, ყველამ უნდა იცოდეს, რომ კანონის წინაშე ყველა თანასწორია და ხელისუფლების და უფლებამოსილების ბოროტად გამოყენების ფაქტებზე კანონის შესაბამისად მოხდება ყველას პასუხისგებაში მიცემა“, - განაცხადა ირაკლი ნადარეიშვილმა.