პანკისის ხეობაში ჩატარებულის სპეცოპერაცია - თბილისის საქალაქო სასამართლო დაკავებული პირების საქმეს, პროკურატურის მოთხოვნის საფუძველზე, ცალ-ცალკე განიხილავს. სასამართლო ამ ეტაპზე დაკავებული ზურაბ გორნაკაშვილის საქმეზე მსჯელობს.

გორნაკაშვილის ადვოკატი ირაკლი ბენია სასამართლოს შუამდგომლობით მიმართავს, რომ დაკავებულს აღკვეთის ღონისძიების სახით გირაო შეეფარდოს:

"პროკურატურა, სავარაუდოდ, პატიმრობას მოითხოვს, დაცვის მხარეს კი გვექნება შუამდგომლობა, რომ მას აღკვეთის ღონისძიების სახით გირაო შეეფარდოს. კონკრეტულ მტკიცებულებებზე ვერ ვისაუბრებ. საქმის მასალებში არსებობს სხვადასხვა სახის მტკიცებულებები. თუმცა, დაცვის მხარე თვლის, რომ მტკიცებულებები არ იძლევა საფუძველს, რომ ჩემი დაცვის ქვეშ მყოფი მონაწილეობდა ამ დანაშაულებრივი ქმედების ჩადენაში", - განაცხადა ბენიამ.

ადვოკატის ტქმით, ის ფაქტი, რომ გორნაკაშვილის საქმეს სასამართლო ცალკე განიხილავს არ ნიშნავს იმას, რომ დაკავებული გამოძიებასთან თანამშრომლობს:

"პროკურატურას აქვს უფლება ცალ-ცალკე შეიტანოს საქმეები. ჩემი დაცვის ქვეშ მყოფი რამდენჯერმეა დაკითხული ამ საქმეზე, მათ შორის დაკავებამდეც. ასევე დაიკითხა დაკავების შემდეგაც, თუმცა კონკრეტულ დეტალებზე ვერ ვისაუბრებ", - განაცხადა ბენიამ.