მუხთარლის საქმეზე დღეს აზერბაიჯანელ მესაზღვრეებს დაკითხავენ

სამართალი - 10:27, 28 Dec, 2017

1564

აზერბაიჯანის სასამართლო აფგან მუხთარლის საქმის განხილვას განაგრძობს. ბელქანის რაიონული სასამართლო დღეს აზერბაიჯანელ მესაზღვრეებს დაკითხავს.

მუხთარლის უფლებადამცველების თქმით სასამართლო სახელმწიფო დაკვეთას ასრულებენ და ამიტომ გამამართლებელი განაჩენის იმედი არ აქვთ. თავად აფგან მუხთარლი თვლის რომ მისი დაკავება აზერბაიჯანის პრეზიდენტის ოჯახზე ჩატარებულ ჟურნალისტურ გამოძიებას უკავშირდება.

შეგახსენებთ, 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, ის თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა გარკვეული პერიოდი ცხოვრობდნენ, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდიდნენ.