სპეცოპერაცია პანკისის ხეობაში - დაკავებული ზურაბ გორნაკაშვილი ბრალს არ აღიარებს. გორნაკაშვილს ბრალი ე.წ. მოდულის შენობაში წაუყენეს. გორნაკაშვილს გამოძიება ტერორიზმის დაფინანსებას ან ტერორისტული საქმიანობის სხვაგვარ მატერიალურ მხარდაჭერას ედავება. მისი ადვოკატის, ირაკლი ბენიას განცხადებით, გამოძიებამ მას მასალები გადასცა, რომელიც საკმაოდ მოცულობითია და შეიცავს გარკვეულ ჩანაწერებს.

„ჩემი დაცვის ქვეშ მყოფი ამ ეტაპზე ბრალს არ აღიარებს. მისი პოზიციიდან გამომდინარე, კონკრეტულ დეტალებზე საუბრისგან თავს შევიკავებ. გორნაკაშვილი მანამდე მოწმის სახით დაკითხულია და ჩვენებები მიცემული აქვს. თუმცა, ჩვენების მიცემა არ ნიშნავს, რომ ის ბრალს აღიარებს. რა მუხლითაც აქვს წაყენებული ბრალი, იმ ქმედებას ამ ეტაპზე არ აღიარებს“, - განაცხადა ირაკლი ბენიამ.