პანკისის ხეობაში ჩატარებული სპეცოპერაციისას დაკავებულ პირებს ბრალს უახლოეს საათებში წაუყენებენ.

ბრალდებულები წინასწარი დაკავების იზოლატორში ადვოკატებმა უკვე მოინახულეს.

უფლებადამცველები აცხადებენ, რომ ისინი აჰმედ ჩატაევთან კავშირს კატეგორიულად უარყოფენ და მომხდარი მათთვის მოულოდნელი იყო. დაკავებულები ბრალს არ აღიარებენ.

„მან საერთოდ არ იცის, კონკრეტულად რაში გვედება ბრალი. მხოლოდ და მხოლოდ ცნობილია ის გავრცელებული ინფორმაცია, რაც ტელევიზიით გავიგეთ. შესაბამისად, ბრალზე საუბარი, რა მუხლს წაგვიყენებენ, არ ვიცით ოფიციალურად.

რაიმე კავშირს ჩატავეთან, მომხდარ დანაშაულთან კატეგორიულად უარყოფს და საერთოდ ამბობს, რომ ის არ იცნობს ახმედ ჩატაევს, შესაბამისად არც რაიმე ურთიერთობა არ ჰქონია და ვერც ექნებოდა,“ - აცხადებს ბადურ ჩოფანაშვილის და რამაზ მარგოშვილის ადვოკატი დალი ბარბაქაძე.

ერთ-ერთი დაკავებულის ადვოკატი, ირაკლი ბენია კი დასაცავი პირის ვინაობას არ ასახელებს.

„ არ აღიარებს ბრალს, რა ფაქტთან დაკავშირებითაც დაკავებულია. მე როცა შევხვდი, მისთვის არ იყო ცნობილი, ვინ და რომელი პიროვნებები არიან დამატებით დაკავებული, შესაბამისად, იცნობდა თუ არა, ამ ეტაპზე არ ვიცი მისი პოზიცია სხვა დაკავებულების მიმართ. ჯერჯერობით არანაირი მტკიცებულება დაცვის მხარეს არ გადმოგვეცა,“ - განაცხადა ადვოკატმა ირაკლი ბენიამ.

ადვოკატის თქმით, საქმის მასალებს არ იცნობს და შესაბამისად, გარკვეულ დეტალებზე ვერ ისაუბრებს.

სახელმწიფო უსაფრთხოების სამსახურის კონტრტერორისტული დეპარტამენტის მიერ, გუშინ დილით თბილისსა და ახმეტის რაიონის სოფლებში, დუისსა და ომალოში დაკავებულ იქნა საქართველოს 5 მოქალაქე: ზურაბ გორნაკაშვილი, რუსლან ალდამოვი, რამაზ მარგოშვილი, ბადურ ჩოფანაშვილი და თემირლან მაჩალიკაშვილი. დაკავებული პირები დაკავშირებულები არიან 21-22 ნოემბერს ბერი გაბრიელ სალოსის ქუჩაზე ჩატარებული სპეცოპერაციის შედეგად განეიტრალებული დაჯგუფების წევრებთან და წარმოადგენდნენ მათ ხელშემწყობ პირებს.