ირაკლი ჩხვირკია ადვოკატების მოხსნას ითხოვს - მოსამართლე ცდილობს, ბრალდებულს გადაწყვეტილება შეაცვლევინოს

სამართალი - 12:52, 14 Dec, 2017

2297

ბათუმის საქალაქო სასამართლოში, 11-12 მარტის ბათუმის მოვლენებზე დაკავებულთა პროცესი მიმდინარეობს. დღევანდელ სხდომაზე დაცვის მხარის მტკიცებულებების გამოკვლევა გრძელდება. პროცესს ამ საქმეში ერთ-ერთი ბრალდებული, მერაბ ღოღობერიძე არ ესწრება .

მეორე ბრალდებული ირაკლი ჩხვირკია კი ადვოკატების მოხსნას ითხოვს და აცხადებს, რომ სასამართლოს ობიექტური გადაწყვეტილების იმედი არ აქვს და საკუთარ ინტერესებს თავად დაიცავს.

"გადავწყვიტე, რომ მოვიხსნა ადვოკატები. გთხოვთ, რომ სასამართლოდან გაათავისუფლოთ ისინი. მათი დახმარება სასამართლოში აღარ მჭირდება. ამას რამდენიმე მიზეზი აქვს. პირველი არის ის, რომ მე სასამართლოსგან ობიექტურ გადაწყვეტილებას არ ველოდები. ამ ქვეყანაში არანაირ ობიექტურობას არ ველოდები. გამოძიებამ ჩემს მიმართ შეთითხნა საქმე და პროკურატურა აწარმოებს დისკრიმინაციულ და პოლიტიზირებულ საქმეს. მე ვერ დამისახელებთ ვერც ერთ ფაქტს, რომ სასამართლოს წინაშე გამოვიჩინე უპატივცემულობა, პროკურატურამ კი არ აქვს არგუმენტი ჩემი წინასწარი პატიმრობაში დატოვების შესახებ . პროკურატურა დარწმუნებულია რომ სასამართლო მათ მოთხოვნას დააკმაყოფილებს, მე არ მაქვს მოლოდინი, რომ სასამართლო ობიექტურ გადაწყვეტილებას მიიღებს, მე უდანაშაულო ვარ, არ ვაპირებ დასკვნითი სიტყვის დაწერას და არ მჭირდება ადვოკატი" - განაცხადა პროცესზე ბრალდებულმა.

მოსამართლე დავით მამისეიშვილმა, ბრალდებულს სთხოვა გადაწყვეტილება შეცვალოს და პროცესზე 10 წუთიანი შესვენება გამოაცხადა. "ცდები თუ ასე ფიქრობ რომ სასამართლო არ რის თავისუფალი და პროცესი არის პოლიტიზირებული" - მიმართა ჩხვირკიას მოსამართლემ.

ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.