„პოლიციელები მირტყამდნენ თავსა და გვერდებში... წამება იყო“

„პოლიციელები მირტყამდნენ თავსა და გვერდებში... წამება იყო“ - შსს-ს გენინსპექციამ შესწავლა დაიწყო

სამართალი - 10:24, 14 Dec, 2017

3563

ქურდობის მცდელობაში ბრალდებულები პოლიციას უფლებამოსილების გადამეტების, არაადამიანური მოპყრობისა და თავისუფლების უკანონოდ აღკვეთის მცდელობაში ადანაშაულებენ.

ლევან კუპატაძე და დავით სარალიძე აცხადებენ, რომ გუშინ, საბურთალოს მე-7 განყოფილებაში დაიბარეს, სადაც საგამოძიებო მოქმედების შემდეგ მორიგი ბიოლოგიური ნიმუშების აღებას აიძულებდნენ.

დავით სარალიძის თქმით, არსებობს ექსპერტიზის დასკვნაც, რომელიც მიყენებულ დაზიანებებს ადასტურებს.

„უმიზეზოდ გაგვაჩერეს, ჩამოგვაგდეს მანქანიდან... წამება იყო. გზა ავტომობილით გადამიკეტეს. როგორც კი გავაჩერე, პატარა მანქანაში შემაგდეს გაუჩერებლად მიდიოდა ცემა თავში, გვერდებში, ინსტიქტურად თავზე ხელებს ვიფარებდი. ხელები ამომიტრიალეს, ბორკილები დამადეს და ძალადობა გააგრძელეს. ამიყვანეს ერთ-ერთი კორპუსის ბოლო სართულზე ხელები გამაშლევინეს და კარის ზედაპირზე დამადებინეს,“- განაცხადა დავით სარალიძემ.

მისი თქმით, ამ გზით სამართალდამცავებმა თითის ანაბეჭდები აიღეს, რომ ქურდობის მცდელობა მას დააბრალონ.

ბრალდებულთა ადვოკატი შინაგან საქმეთა ახალ მინისტრს საქმის პირად კონტროლზე აყვანას სთხოვს.

„ბრალი, რომელიც ჩემი დაცვის ქვეშ მყოფებს - დავით ასარალიძესა და ლევან კუპატაძეს წარედგინათ, მათ არ ჩაუდენიათ. გამოძიება ცდილობს, მათ ეს დანაშაული დააბრალოს... შინაგან სამეთა მინისტრს მივმართავთ, რომ აღნიშნული საქმე პირად კონტროლზე აიყვანოს, რადგან სისხლის სამართლის საქმეში არსებული ყველა დოკუმენტი ფალსიფიცირებულია, ისევე როგორც ფაქტობრივი გარემოებები“- აცხადებს ადვოკატი ინგა ბოლთაური.

„ნიუპოსტი“ შინაგან სამეთა სამინისტროს დაუკავშირდა. როგორც უწყებაში აცხადებენ, მიუხედავად იმისა, რომ ბრალდებულებს შს სამინისტროს გენერალური ინსპექციისთვის არ მიუმართავთ, უფლებამოსილების შესაძლო გადამეტების ფაქტის შესწავლა უკვე დაიწყო.

დავით სარალიძე და ლევან კუპატაძე პოლიციამ 1 დეკემბერს დააკავა. გამოძიება მათ ქურდობის რამდენიმე ფაქტს ედავება, თუმცა ბრალს არცერთი მათგანი აღიარებს.

როგორც ირკვევა, ბრალდებულები სასამართლომ გირაოს სანაცვლოდ გაათავისუფლა. შემდეგი სასამართლო სხდომა კი 2018 წლის 11 იანვარსაა ჩანიშნული.