ბელაქანის რაიონულ სასამართლოში დღეს აზერბაიჯანელი ჟურნალისტის აფგან მუხთარლის საქმის განხილვა გაგრძელდება. დაკავებულის ადვოკატები რამდენიმე შუამდგომლობის დაყენებას გეგმავენ, მათ შორის კონკრეტული მოწმეების დაკითხვის შესახებ:

„დღეს პროკურატურას მოუწევს საუბარი იმ მტკიცებულებებზე, რომლის მიხედვითაც, აფგან მუხთარლი ბრალდებულია. მიმაჩნია, რომ აზერბაიჯანელი ჟურნალისტის წინააღმდეგ რეალური მტკიცებულებები არ არსებობს. მუხთარლი იძიებდა მმართველი ძალის ოჯახების კორუფციულ სქემებს და აქვეყნებდა მათ, ის თვლის რომ დაკავების მთავარი მიზეზიც ეს არის. ჩვენ დავაყენებთ შუამდგომლობას და იმ 8 სამხედრო მოსამსახურის დაკითხვას მოვითხოვთ, რომლებიც საქმეში ფიგურირებენ. ისინი მესაზღვრეები არიან და ამბობენ, რომ მუხთარლიმ საქართველო აზერბაიჯანის საზღვარი უკანონოდ გადაკვეთა. თავისთავად, ეს პოლიტიკური პროცესია,“- განაცხადა აფგან მუხთარლის ადვოკატმა, ნიმათ კარიმლმა.