ბუტა რობაქიძის საქმეზე, შს სამინისტროს მაღალჩინოსნების მიერ უფლებამოსილების გადამეტების საქმეზე, თბილისის საქალაქო სასამართლოში ბრალდების მხარის ერთ-ერთი მთავარი მოწმე, გიორგი ჭანტურია იკთხება.

როგორც ჭანტურიამ განაცხადა, რობაქიძის გვერდით ავტომატი არ დაუნახავს.

„ხმამაღალი საუბარი და შეხლა-შემოხლა დაიწყო. მოვთხოვეთ ყველას, ხელები საბარგულზე დაელაგებინათ. კანონსაწინააღმდეგო იარაღი არ ჰქონიათ. ამხელა ავტომატი თუ ვერ დავინახე, დავბრმავებულვარ. ლობჟანიძე და ბაშალეიშვილი რომ მოვიდნენ, გავიგონე გასროლის ხმა. ვიკითხე, რა ხდებათქო, რადგან არ იყო გასროლის წინაპირობა იმიტომ, რომ ეს ადამიანები მაქსიმალურად გვემორჩილებოდნენ და რასაც ვეუბნებოდით, იმას აკეთებდნენ. ვკითხე, რატომ გაისროლეთ-მეთქი. იარაღი გამივარდაო, ბაშალეიშვილმა მითხრა. როცა დაეცა დაჭრილი რობაქიძე, მასთან ავტომატი არ დამინახავს. არ მახსოვს რომ ვინმეს, ვინც იმ ავტომანქანაში იყო, იარაღი ჰქონოდა. არავის არ ჰქონია იარაღი. ჩავიხედე სალონშიც. განათებული იყო ის ადგილი, სადაც გავაჩერეთ მანქანა და ხილვადობა ნორმალური იყო. კრიმინალური პოლიციის მოსვლის შემდეგ ვნახე, რომ რობაქიძის გვერდით ჩნდება ავტომატი. ვინ დადო, ვერ გეტყვით, არ დამინახავს”, - განაცხადა გიორგი ჭანტურიამ.