სასტიკი მკვლელობა ოზურგეთში - შსს-მ ნათესავების მკვლელობაში ბრალდებულ "ბუძგიაზე" ძებნა გამოაცხადა

სამართალი - 14:04, 12 Dec, 2017

12846

შინაგან სამეთა სამინისტრომ მიმდინარე წლის 20 ივლისს გურიაში დამამძიმებელ გარემოებაში მომხდარი განზრახ მკვლელობის ფაქტი გახსნა.

საუბარია 5 თვის წინ, იაკობ შემოქმედელის ქუჩაზე მომხდარ სასტიკ მკვლელობაზე, როცა 42 წლის გურამ ფოცხიშვილი და მისი დის ქმარი 33 წლის დიმა ომოლჩენკო ჩაცხრილეს.

"ნიუპოსტი" თავიდანვე წერდა, რომ ახალგაზრდები შურისძიებას ემსხვერპლნენ. გარდაცვლილთა ოჯახის წევრები აცხადებდნენ, რომ , ბიჭების ჩაცხრილვა წლების წინ მომხდარი კრიმინალური შემთხვევის უკავშირდებოდა.

"ნიუპოსტის" ინფორმაციით, სასიკი მკვლელობისთვის 48 წლის კახა მეგრელიშვილზე ძებნა გამოაცხადდა. გურიაში მას, მეტსახელით - "ბუძგია" იცნობენ.

გთავაზობთ შინაგან სამეთა სამინისტროს ოფიციალურ განცხადებას:

"შინაგან საქმეთა სამინისტროს გურიის პოლიციის დეპარტამენტის თანამშრომლების მიერ ჩატარებული ოპერატიულ-სამძებრო და საგამოძიებო ღონისძიებების შედეგად, 1969 წელს დაბადებულ, წარსულში ნასამართლევ კ.მ.-ს, მოსამართლის განჩინების საფუძველზე, დამამძიმებელ გარემოებაში ჩადენილი განზრახ მკვლელობის ფაქტზე, მიმდინარე წლის 7 დეკემბერს ბრალი დაუსწრებლად წარედგინა და აღკვეთის ღონისძიების სახით პატიმრობა შეეფარდა.

გამოძიებამ დაადგინა, რომ კ.მ. განაწყენებული იყო ნაცნობზე - გ.ფ.-ზე, რომელმაც წარსულში, შეიარაღებულმა სახლში მიაკითხა და მის მეუღლეს ფიზიკური შეურაცხყოფა მიაყენა. ბრალდებულმა, ანგარიშსწორების მიზნით, გ.ფ.-ს მოკვლა განიზრახა. ამისთვის მან სპეციალურად, ფარულად შეიძინა ავტომანქანა და ცეცხლსასროლი იარაღი. გამოძიების ინფორმაციით, მიმდინარე წლის 20 ივლისს, კ.მ. და მისი თანამზრახველი ავტომობილით აედევნენ მსხვერპლს - 1975 წელს დაბადებული გ.ფ., რომელიც ოზურგეთში, ნათესავთან - 1984 წელს დაბადებული დ.ო.-სთან ერთად ავტომანქანით გადაადგილდებოდა, ავტომატური ცეცხლსასროლი იარაღიდან და მაკაროვის სისტემის პისტოლეტიდან რამდენიმე გასროლით სასიკვდილოდ დაჭრეს ისინი და შემთხვევის ადგილიდან მიიმალნენ. გ.ფ. და დ.ო. მიყენებული ჭრილობების შედეგად ადგილზე გარდაიცვალნენ".

გამოძიებით ასევე დადგინდა, რომ შემთხვევის ადგილიდან მიმალულმა ბრალდებულმა და მისმა თანამზრახველმა ავტომანქანა ოზურგეთის რაიონის სოფელ მელექედურის ტერიტორიაზე დაწვეს და მიატოვეს.

გამოძიება ორი ან მეტი პირის მიერ დამამძიმებელ გარემოებაში ჩადენილი განზრახ მკვლელობის ფაქტზე მიმდინარეობს, საქართველოს სსკ-ს 109-ე მუხლის მე-3 ნაწილის „ა“ ქვეპუნქტით, რაც თექვსმეტიდან ოც წლამდე ვადით ან უვადო თავისუფლების აღკვეთას ითვალისწინებს. გამოძიებას შინაგან საქმეთა სამინისტროს გურიის პოლიციის დეპარტამენტი აწარმოებს.

ბრალდებულ კ.მ.-ზე, მოსამართლის განჩინების საფუძველზე, ძებნა გამოცხადდა".