რობაქიძის საქმე - პროკურორი აზარიაშვილის დაკითხვის საჭიროებას ვერ ხედავს

სამართალი - 12:52, 11 Dec, 2017

1873

თბილისის საქალაქო სასამართლო შს სამინისტროს ყოფილი მაღალჩინოსნების მიერ უფლებამოსილების გადამეტების ბრალდებაზე მსჯელობს.

დაცვის მხარე საქმს ერთ-ერთი მოწმის დაკითხვას მოითხოვს. მისი თქმით, კახაბერ აზარიაშვილი 2006 წელს დაწერილ განცხადებაში აღნიშნავს, რომ ბუტა რობაქიძესთან ერთად ავტომობილში იმყოფებოდა და თან ცეცხლსასროლი იარაღი ჰქონდა.

საქმის პროკურორი კი აცხადებს, რომ აზარიაშვილის დაკითხვის საჭიროება ამ დროისთვის არ დგას.

„ბრალდების მხარე განსაზღვრავს მოწმეთა დაკითხვის მიმდინარეობას. ამ ეტაპზე მტკიცებულებების გამოკვლევა ხდება. შესაბამისად, ჩვენი სტრატეგიიდან გამომდინარე, ჯერჯერობით იკითხებიან ის მოწმეები, რომლებსაც ბრალდების მხარე წარმოადგენს - გადაცემა „პატრულთან“ დაკავშირებით და ადგილზე მისული პატრულ-ინსპექტორების დაკითხვა ხდება. შემდეგ კი დაიკითხებიან ისინი, ვინც დასაკითხთა სიაში გვყავს შეყვანილი“, - განაცხადა საქმის პროკურორმა გიორგი ოსაძემ.

ცნობისთვის, „ნიუპოსტისთვის“ სასამართლოს დაწყებამდე ექსკლუზიურად გახდა ცნობილი, რომ ბრალდების მხარე ბუტა რობაქიძის საქმის მოწმეს მალავდა, ანუ წყაროს ინფორმაციით, 2004 წლის 23 ნოემბერს ავტომანქანაში, გარდაცვლილ ბუტა რობაქიძესთან ერთად, კიდევ ერთი პიროვნება იმყოფებდა, თუმცა მიუხედავად იმისა, რომ ამ საქმეზე ხელახალი გამოძიება რამდენიმე წელია მიმდინარეობს, პროკურატურას აღნიშნული პიროვნება არ დაუკითხავს.

სხვათა შორის, წყარომ „ნიუპოსტს“ ფოტოც მოაწოდა, რომელიც ზემოხსენებული ინციდენტის დროსაა გადაღებული და რომელზეც ნათლად ჩანს, რომ პოლიციას ახალგაზრდა მამაკაცი ჰყავს დაკავებული. როგორც წყარო ამბობს, სწორედ ეს ახალგაზრდა მამაკაცი, კახა აზარიაშვილია მოწმე, რომელსაც პროკურატურა მალავს.