11-12 მარტის ბათუმის მოვლენები - ღოღობერიძისა და ჩხვირკიას სასამართლო პროცესზე დაცვის სამი მოწმე დაიკითხა

სამართალი - 20:00, 29 Nov, 2017

1411

11-12 მარტის ბათუმის მოვლენებზე დღეს მორიგი სასამართლო პროცესი გაიმართა, ჩხვირკვია- ღოღობერიძის საქმის განხილვაზე დაცვის მხარის სამი მოწმე დაიკითხა. ბრალდებულთაგან სასამართლოს მხოლოდ მერაბ ღოღობერიძე ესწრებოდა.

მერაბ ღოღობერიძის ადვოკატის, პაატა შავაძის თქმით, მოწმეების დღევანდელმა დაკითხვამ კიდევ ერთხელ აჩვენა ბრალდების აბსურდულობა. მას იმედი აქვს, რომ მოსამართლე მიიღებს სამართლიან გდაწყვეტილებას და მერაბ ღოღობერიძეს უდანაშაულოდ სცნობს.

„ჩვენ არაერთხელ განვმარტეთ ამის თაობაზე, რომ ბრალდების მხარის მიერ წარმოდგენილი ვერცერთი მტკიცებულება ვერ გადალახავს ისეთ მაღალ სტანდარტს, როგორიც არის გონივრულ ეჭვს მიღმა, რამეთუ მათ ვერ შეძლეს უკვე გამოკვლეული, მათი მიერ წარმოდგენილი მტკიცებულებებით მოეხდინათ ბრალდების დადასტურება. ჩვენ მიგვაჩნია, რომ ჩვენ გავაქარწყლებთ დადგენილებაში მითითებულ ბრალდების ყველა გარემოებას და მიგვაჩნია, რომ მერაბ ღოღობერიძე აღნიშნულ სისხლის სამართლის საქმეზე უდანაშაულოს უნდა იქნას ცნობილი,“- განაცხადა შავაძემ.

დღევანდელ სხდომას არ დასწრებია ირაკლი ჩხვირკია, მან წინა სასამართლო სხდომაზე აღნიშნა, რომ სხდომას არ დაესწრებოდა.

მომდევნო სასამართლო სხდომა შაბათს, 2 დეკემბერს 12:00 საათზე ჩაინიშნა. სასამართლო კვლავ დაცვის მხარეს მოუსმენს, რის შემდეგაც მხარეები დასკვნით სიტყვას იტყვიან და მოსამართლე განაჩენის გამოსატანად გავა.

ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.