6.5 მლნ ლარის ე.წ ფარული ხარჯი - თემურ ჯანაშია ანზორ ჩუბინიძის საქმიანობაზე

სამართალი - 11:55, 29 Nov, 2017

2874

სახელმწიფო დაცვის სახელმწიფო სამსახურის ყოფილი უფროსის თემურ ჯანაშიას თქმით, შესაბამისი უწყების მიერ პრეზიდენტის ვიზიტებზე ფარული ხარჯების გაწევა არა მარტო მისი ხელმძღვანელობის , არამედ ანზორ ჩუბინიძის დროსაც ხდებოდა. აღნიშნული განცხადება ჯანაშიამ ე.წ. პიჯაკების საქმეზე სასამართლო პროცესის დაწყებამდე გააკეთა.

თემურ ჯანაშიას ინფორმაციით, ანზორ ჩუბინიძის ხელმძღვანელობით სახელმწიფო დაცვის სპეციალურმა სამსახურმა 7 თვეში 6 მილიონ 500 ათასი ლარის ე.წ. ფარული ხარჯი გასწია.

"წინა სასამართლო პროცესზე ჩვენ წარვადგინეთ დაახლოებით მილიონამდე გადარიცხვა, რაც მხოლოდ ერთ თანამშრომელზე იყო გაცემული. ახლა სათითაოდ ვიკვლევთ ამ გადარიცხვებს და წარმოვადგენთ ამ მტკიცებულებებს. ზოგადად 7 თვის განმავლობაში დაახლოებით 6.5 მილიონია დახარჯული ე.წ. ფარული ხარჯების სახით. ადრე თუ გვიან, ამ ყველაფერს ფარდა აეხდება", - აღნიშნა თემურ ჯანაშიამ.

სახელმწიფო დაცვის სპეციალური სამსახურის მიერ გაწეული ხარჯებისთვის, რომელსაც გრიფი საიდუმლო ედო, ბრალი წარედგინა ყოფილ პრეზიდენტ მიხეილ სააკაშვილს და სდსს-ს ყოფილ ხელმძღვანელს თემურ ჯანაშიას.

პროკურატურის ცნობით, დიდი ოდენობით საბიუჯეტო თანხების გაფლანგვის ფაქტზე გამოტანილი იქნა დადგენილებები საქართველოს ყოფილი პრეზიდენტის მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის თეიმურაზ ჯანაშიას ბრალდებულის სახით სისხლის სამართლის პასუხისგებაში მიცემის შესახებ. საქმე ეხება სახელმწიფოს კუთვნილი 8 837 461 ლარის გაფლანგვის ფაქტს.