ვანო მერაბიშვილის ადვოკატი, გიორგი ჩივიაშვილი აცხადებს, რომ სტარსბურგის სასამართლომ ვანო მერაბიშვილის პოლიტპატიმრობა დაადასტურა.

„დღეს სტრასბურგის სასამართლოს დიდმა პალატამ დაადასტურა ის რასაც ჩვენ ამდენი ხანი ვამბობდით, რომ ვანო მერაბიშვილი არის პოლიტიკური პატიმარი“, - აღნიშნა უფლებადამცველმა.

მისი თქმით, წულუკიანის განცხადება, რომ ამ გადაწყვეტილებით ხელისუფლებისთვის საზიანო არაფერი მომხდარა და რომ მერაბიშვილს არ მოუგია სასამართლო პროცესი არალოგიკურია.

„ეს უკვე აღიარებული არის სტრასბურგის სასამართლოს მიერ, რაც შეეხება შინაარსობრივ ნაწილს, იცით, რომ საქართველოს ხელისუფლებამ, იუსტიციის სამინისტრომ გაასაჩივრა ჩვენ მიერ უკვე მოგებული გადაწყვეტილება, სადაც საუბარი იყო კონვენციის მე-18 მუხლის დარღვევაზე და ასევე მე-5 მუხლის მე-3 ნაწილის დარღვევაზე.

შესაბამისად დიდმა პალატამ იმსჯელა და აღნიშნული გადაწყვეტილება დატოვა ძალაში და დაადგინა, რომ ივანე მერაბიშვილის მიმართ დარღვეულია ეს მუხლები. შესაბამისად,საქართველოს ხელისუფლებას მერაბიშვილის სახით ჰყავს პოლიტიკური პატიმარი.

რაც შეეხება ქალბატონი წულუკიანის განცხადებას იმასთან დაკავშრებით, რომ თითქოს და ხელისუფლებისთვის საზიანო არაფერი მომხდარა ამ გადაწყვეტილებით და მათ არაფერი წაუგიათ არის ლოგიკას მოკლებული. ჩვენ გვახსოვს მისი განცხადებები, როდესაც იყო პირველი გადაწყვეტილება სტრასბურგის და იგი აცხადებდა, რომ ხელისუფლებას არ წაუგია და არ დამარცხებულა სტრასბურგის სასამართლოში. თუმცა შემდგომ ეს გადაწყვეტილება გაასაჩივრეს დიდ პალატაში. დღეს დიდმა პალატამ გამოიტანა გადაწყვეტილება, სადაც თქვა, რომ ძალაში დატოვა ძველი გადაწყვეტილება. გამოდის დღეს ქალბატონი მინისტრი და ამბობს, რომ ამ შემთხვევაშიც ხელისუფლების საზიანო გადაწყვეტილება არ ყოფილა მიღებული და ივანე მერაბიშვილს არ მოუგია სასამართლო. ეს ერთმანეთთან ვერ მოდის თანხვედრაში და არალოგიკურია“,-განაცხადა გიორგი ჩივიაშვილმა.