საგარეო საქმეთა სამინისტრო იტალიაში ქართველის ცემით მოკვლის ფაქტს არ ადასტურებს

სამართალი - 19:49, 16 Nov, 2017

3016

როგორც საგარეო საქმეთა სამინისტროში „ნიუპოსტს“ განუცხადეს, გავრცელებული ცნობა, რომ იტალიის ქალაქ ტურინის საიმიგრაციო ცენტრში ბუნტის დროს საქართველოს მოქალაქე გარდაიცვალა, სიმართლეს არ შეესაბამება.
„დღეს, 16 ნოემბერს, გ. წ. დაუკავშირდა საკონსულო სამსხურს ცხელი ხაზის ნომერზე და აცნობა ქ. ტურინის საიმიგრაციო ცენტრში მომხადარი ბუნტის თაობაზე. მანვე განაცხადა, რომ სადეპორტო ცენტრში გარდაიცვალა ეროვნებით ქართველი, რომელიც ფლობს აზერბაიჯანულ პასპორტს.

აღსანიშნავია, რომ საკონსულო სამსხურისთვის ცნობილი იყო ქ. ტურინის სადეპორტო ცენტრში მომხდარი ბუნტის თაობაზე და უკვე 14 ნოემბერს შედგა სატელეფონო საუბარი ქ. ტურინის საიმიგრაციო სამსახურთან ბუნტის თაობაზე ინფორმაციის მოძიების მიზნით, რა დროსაც საკონსულოს ეცნობა, რომ საქართველოს მოქალაქეები არ დაშავებულან და მათ ჯანმრთელობის მდგომარეობას არ ემუქრება საფრთხე. არ დაადასტურეს ბუნტის დროს გარდაცვალების ფაქტი.

გ.წ. სატელეფონო ზარის შემდგომ, საკონსულო სამსახურმა ხელმეორედ გადაამოწმა ინფორმაცია იტალიურ მხარესთან, რა დროსაც კვლავ არ დადასტურდა გ.წ.-სგან მიღებული ცნობები.

აღსანიშნავია, რომ გ.წ. სატელეფონო საუბრისას ითხოვა შეხვედრა საკონსულოს თანამშრომელთან. ამ მოთხოვნის შესაბამისად საკონსულოს წარმომადგენელი გაემგზავრება ქ. ტურინში, ხოლო იტალიის შესაბამისი ორგანოების მხრიდან სადეპორტო ცენტრში ვიზიტის განხორციელების ნებართვის მიღების შემთხვევაში მოინახულებს მოქალაქეს,“ - განაცხადეს საგარეო უწყებაში.