„მთვრალი პოლიციელები მომდევდნენ და მესროდნენ“ - 18 წლის ბიჭი სამართალდამცავებს ადანაშაულებს

შემთხვევა - 11:20, 16 Nov, 2017

3185

რუსთავში, 18 წლის რობი ღონღაძე ნასვამ სამართალდამცავებს დევნასა და ცემაში ადანაშულებს. ინციდენტი, როგორც ახალგაზრდა ამბობს, 12 ნოემბერს მოხდა.

მომდარის შესახებ ღონღაძე „ინფო რუსთავთან“ საუბრობს და აცხადებს, მეგობრებთან ერთად იმყოფებოდა, როდესაც მასთან კრიმინალური პოლიციის მანქანა გაჩერდა, მაღაზიის სავარაუდო გაქურდვაში დაადანაშაულეს და მისი განყოფილებაში გადაყვანა სცადეს.

„აქ რას აკეთებთ, მაღაზიის გაქურდვას ხომ არ აპირებთ?" - აღნიშნავს ღონღაძე.

ახალგაზრდის თქმითვე, სამართალდამცავებს, რომლებიც ნასვამ მდგომარეობაში იმყოფებოდნენ, ზრდილობიანად უპასუხა, თუმცა პოლიციელებმა მისი მანქანაში ძალის გამოყენებით ჩასმა და განყოფილებაში გადაყვანა სცადეს, თუმცა ღონღაძემ გაქცევა მოახერხა. როგორც ახალგაზრდა ამბობს, პოლიციელები სწორედ ამ დროს დაედევნენ და სროლა დაიწყეს. ბიჭი წაიქცა და პოლიციელებმა უმოწყალოდ სცემეს.

როგორც „ნიუპოსტს“ შინაგან საქმეთა სამინისტროში განუცხადეს, მომდარზე მოქალაქემ მიმართა და შსს-ს გენერალურმა ინსპექციამ რეაგირება მოახდინა, მაგრამ შეტყობინების ინიციატორთან კავშირის დამყარება ვერ მოხერხდა.

„მიმდინარე წლის 12 ნოემბერს შსს-ს გენერალურ ინპექციაში შემოვიდა მოქალაქის შეტყობინება ქალაქ რუსთავში პოლიციელების მხრიდან მის მიმართ განხორციელებული სიტყვიერი და ფიზიკური შეურაცხყოფის შესახებ.

შსს-ს გენერალურმა ინსპექციამ მიღებულ შეტყობინებაზე მყისიერი რეაგირება მოახდინა, თუმცა მრავალგზის მცდელობის მიუხედავად, შეტყობინების ინიციატორთან სატელეფონო კავშირის დამყარება ვერ მოხერხდა.

ამავე თემაზე შსს-ს გენერალურ ინსპექციას, ასევე, მიმართა სახალხო დამცველის რუსთავის ოფისის წარმომადგენელმა და დამატებითი ინფორმაციის მოწოდების მიზნით, შსს-ში, შეტყობინების ინიციატორ მოქალაქესთან ერთად, მიმდინარე წლის 16 ნოემბერს გამოცხადების სურვილი გამოთქვა.

სახალხო დამცველის წარმომადგენელსა და შეტყობინების ინიციატორ მოქალაქესთან გასაუბრების შემდეგ, ობიექტური ჭეშმარიტების დასადგენად, შსს-ს გენერალური ინსპექცია შესაბამის და ყველა საჭირო მოქმედებას განახორციელებს,“ - აღნიშნავენ შსს-ში.