დაკავებული გრიგოლ კაპანაძის ცემის ბრალდებას შსს განცხადებით პასუხობს

სამართალი - 10:52, 10 Nov, 2017

1860

ხულიგნობის ბრალდებით დაკავებული ახალგაზრდა მამაკაცი, სამართალდამცველებს ცემაში ადანაშაულებს.

გრიგოლ კაპანაძე გამოკვლევისთვის ახალციხის რეფერალურ ჰოსპიტალში იყო მოთავსებული. მისი მონახულების უფლება ქონდა ადვოკატსაც. ეკა აბაშიძის თქმით, დაკავებულს დაზიანებები აღენიშნება. კაპანაძე ამბობს, რომ პოლიციელებმა სცემეს. ადვოკატის განცხადებით, კლინიკაში მას შემდეგ გადაიყვანეს, რაც დროებითი მოთავსების იზოლატორმა, მისი ჯანმრთელობის მდგომარეობის გამო, დაკავებული არ მიიღო. უფლებადამცველი და ოჯახის წევრები, მომხდარის გამოძიებას მოითხოვენ.

თამაზ კაპანაძის თქმით, მისი შვილი ერთი თვის წინაც დააკავეს, სცემეს და გამოუშვეს. მიზეზად კი იმას ასახელებს, რომ გრიგოლ კაპანაძის სიმამრი, კანონიერი ქურდია.

„არ მაჩვენებენ ჩემს შვილს და არის ნაცემი, ეს პირადად სცემა ავთანდილ გალდავამ. ჩემს შვილზე და ჩემს ოჯახზე მთელ პოლიციას ამ 5 წლის განმავლობაში აქვს აგრესია. პირველ ბიჭს იარაღი ჩაუდეს და დღესაც ციხეში ზის, ამ პატარა ბიჭის სიმამრი არის კანონიერი ქურდი, მერე რა ვქნათ, რომ კანონიერი ქურდია/“- განაცხადა თამაზ კაპანაძემ.

სამართალდამცველების მიმართ, დაკავებული მამაკაცის ოჯახის წევრების პრეტენზიას, რომ გრიგოლ კაპანაძე პოლიციელებმა სცემეს, შსს ოფიციალური განცხადებით ეხმაურება. შსს-ს განცხადებით ახალციხეში ერთ-ერთ თურქულ ბარში, პირთა ჯგუფმა ბარში მყოფ საქართველოს და თურქეთის რესპუბლიკის მოქალაქეებს, შესვლისთანავე, ჯერ სიტყვიერი, შემდეგ კი ფიზიკური შეურაცხყოფა მიაყენეს, რა დროსაც თურქეთის რესპუბლიკის ერთ-ერთმა მოქალაქემ თავის არეში დაზიანება მიიღო. ახალგაზრდები არ დაემორჩილნენ შემთხვევის ადგილზე მისული პოლიციელების არაერთგზის კანონიერ მოთხოვნას, დაეცვათ წესრიგი. მათ სამართალდამცველებს სიტყვიერი შეურაცხყოფა მიაყენეს, რის შემდეგაც პოლიციამ ისინი ადმინისტრაციული წესით, პოლიციელის კანონიერი მოთხოვნისადმი დაუმორჩილებლობის ფაქტზე (საქართველოს ასკ-ს 173-ე მუხლით), ადგილზე დააკავა. ადმინისტრაციული წესით დაკავებული სამივე პირი პოლიციამ ახალციხის დროებითი მოთავსების იზოლატორში გადაიყვანა, სადაც მათ შესაბამისი სამედიცინო შემოწმება ჩაუტარდათ. ერთ-ერთმა დაკავებულმა, გ.კ.-მ დამატებითი სამედიცინო შემოწმება მოითხოვა. პოლიციამ იგი, შემდგომი გამოკვლევის მიზნით, ახალციხის რეფერალურ საავადმყოფოში მიიყვანა. საავადმყოფოში გ.კ.-ს ჯანმრთელობის დეტალური შემოწმება ჩაუტარდა, კომპიუტერული ტომოგრაფიების ჩათვლით, რის შედეგადაც დადგინდა, რომ მას რაიმე სახის დაზიანება ან ჯანმრთელობასთან დაკავშირებული პრობლემა არ აღენიშნება. გ.კ. ამჟამად გადაყვანილია ახალციხის რაიონულ სასამართლოში, სადაც მიმდინარეობს მის მიმართ ადმინისტრაციული სამართალწარმოების საქმის განხილვა.

გამოძიება ხულიგნობის ფაქტზე მიმდინარეობს (საქართველოს სსკ-ს 239-ე მუხლის პირველი ნაწილით).