გუკა რჩეულიშვილი "ცეტრ პოინტის" საქმეზე სასამართლოს ჩვენებას ერთი თვის შემდეგ მისცემს

სამართალი - 15:13, 24 Oct, 2017

1181

„ცენტრ პოინტის“ საქმეზე სასამართლო პროცესი ერთი თვით გადაიდო, მიზეზი ბრალდებული გუკა რჩეულიშვილის მოთხოვნა გახდა. მისი თქმით, კომპანიასთან რომელმაც „ცენტრ პოინტის“ ობიექტები უნდა დაასრულოს , მოლაპარაკებებს და დეტალების დაზუსტებას კიდევ 3 კვირა დასჭირდება. რჩეულიშვილმა განმარტა, რომ კომპანიებთან მოლაპარაკებები თითქმის დასკვნით ეტაპზეა მისული და მისი ჩვენების შინაარსი სწორედ ამაზეა დამოკიდებული:

„დაახლოებით, სამი კვირა დაგვჭირდება, რომ მყიდველმა ზუსტი მდგომარეობა ბოლო კვადრატამდე შეადაროს. საერთო სურათი შედარებულია, მაგრამ ახლა დეტალების შედარება მიდის, რაც აუცილებელია ხელშეკრულების დასადებად. აქედან გამომდინარე, ჩვენ ერთთვიანი გადადების ვადა მოვითხოვეთ, რამეთუ იმ მომენტამდე ველოდებით, რომ ჩარჩო ხელშეკრულება ჩვენ და მყიდველს შორის დადებული იქნება, გაწელვაზე არ არის ლაპარაკი, გთხოვთ, შემოდით ჩემს მდგომარეობაში და გადავდოთ ერთი თვით პროცესი. ეს შედის როგორც ჩემს, ასევე დაზარალებულების ინტერესში.“- განაცხადა გუკა რჩეულიშვილმა.

ბრალდებისა და ასევე დაცვის მხარის მტკიცებით, საპროცესო შეთანხმების შესახებ გადაწყვეტილება, მოლაპარაკებების შედეგზე იქნება დამოკიდებული.

„იმ პოზიციის შემდგომ, რომ იქნება თანხმობა ყველა დაზარალებულის მხრიდან, მაია რჩეულიშვილსა და რუსუდან კერვალიშვილთან საპროცესო შეთანხმება გაფორმდება,“- განაცხადა პროკურორმა, დავით გუმბერიძემ.