საქალაქო სასამართლოს გადაწყვეტილებით, ადვოკატ გიორგი მდინარაძის ცემის ფაქტზე უფლებამოსილების გადამეტებაში ბრალდებულ ლაშა კვირკვაიას 10 000-ლარიანი ჯარიმა დაეკისრა.

"თბილისის საქალაქო სასამართლომ დაასრულა სისხლის სამართლის საქმის განხილვა პოლიციის უფროსის ლაშა კ.ს მიერ, ადვოკატ გიორგი მ.ს მიმართ, ძალადობის გამოყენების ფაქტზე, რა დროსაც ადვოკატმა მიღო სხეულის დაზიანება.

ლაშა კ.ს ბრალი ედებოდა მასში, რომ ჩაიდინა სამსახურებრივი უფლებამოსილების ძალადობით გადამეტება, რამაც ფიზიკური პირის უფლების და სახელმწიფოს კანონიერი ინტერესის არსებითი დარღვევა გამოიწვია.

საქმის მასალების თანახმად, 2015 წლის 8 ნოემბერს, საქართველოს შს სამინისტროს ქ. თბილისის მთავარი სამმართველოს ვაკე-საბურთალოს სამმართველოს მე-5 განყოფილების უფროსს ლაშა კ.-ს შეკამათება მოუვიდა, იმავე განყოფილებაში მისულ ადვოკატ გიორგი მ.-სთან, მისი დაცვის ქვეშ მყოფი - არასრულწლოვნის მიერ დუმილის უფლების გამოყენების გამო. ლაშა კ.-მ ძალადობით გადაამეტა სამსახურებრივ უფლებამოსილებას და გიორგი მდინარაძეს მიაყენა ჯანმრთელობის დაზიანება.

საქმის არსებითად განხილვისას ბრალდებულმა თავი არ ცნო დამნაშავედ წარდგენილ ბრალდებაში, თუმცა სასამართლო სხდომაზე გამოკვლეულ მტკიცებულებათა შეფასებისას სასამართლომ დადასტურებულად მიიჩნია, ბრალდებულის მხრიდან სამსახურებრივი უფლებამოსილების გადამეტების ფაქტი. მტკიცებულებათა არასაკმარისობის გამო, სასამართლომ გონივრულ ეჭვს მიღმა სტანდარტით დადასტურებულად ვერ ცნო ლაშა კ.-ს ბრალდება, მასში რომ მან სამსახურებრივი უფლებამოსილების გადამეტება ჩაიდინა ძალადობით. შესაბამისად სასამართლომ ბრალდებულის ქმედება გადააკვალიფიცირა სამსახურებრივი უფლებამოსილების გადამეტებაზე. ბრალდებულის პიროვნების და ქმედების ხასიათის გათვალისწინებით, ლაშა კ.-ს სასჯელის სახედ და ზომად ჯარიმა -
12 000 ლარი განესაზღვრა, რაც ბრალდებულის პატიმრობაში ყოფნის ვადის გათვალისწინებით, შეუმცირდა და საბოლოოდ, ჯარიმის ოდენობა განისაზღვრა 10 000 ლარის ოდენობით"- აცხადებენ საქალაქო სასამართლოში.

2016 წლის 8 ნოემბერს ადვოკატმა გიორგი მდინარაძემ განაცხადა, რომ ფიზიკური შეურაცხყოფა მას ვაკე-საბურთალოს პოლიციის სამმართველოს მეხუთე განყოფილებაში ლაშა კვირკვაიამ მიაყენა.

კვირკვაიას ჯერ უფლებამოსილება შეუჩერდა, მოგვიანებით კი, პროკურატურაში დაწყებული გამოძიების საფუძველზე, პოლიციის მაღალჩინოსანი დააკავეს.

ლაშა კვირკვაიას მტკიცებით, ადვოკატმა პოლიციელებს შეურაცხყოფა მიაყენა, დაკავებისას კი თვითდაზიანებები მიიყენა.

ბრალდებული, დაკავების შემდეგ, შეუძლოდ გახდა და მას რესპუბლიკურ საავადმყოფოში, აღკვეთის ღონისძიების სახით, პატიმრობა შეუფარდეს. რამდენიმე კვირაში კი, პირველ წინასასამართლო სხდომაზე დაცვის მხარემ აღკვეთის ღონისძიების შეცვლის თაობაზე შუამდგომლობა დააყენა და კვირკვაია 10 000-ლარიანი გირაოს სანაცვლოდ გათავისუფლდა.