"სამართალდამცველთა კოპირებული ჩვენებები და შეცვლილი პოლიცია"- რას ამბობენ ენმ-ს აქციაზე დაკავებულები

სამართალი - 12:23, 17 Oct, 2017

2892

თბილისის მერიასთან აქციის დროს დაკავებულების ადვოკატი გოგა ონიანი ამბობს, რომ პოლიციელთა ჩვენებები, რომელიც ბრალდების მხარის მიერ იქნა წარდგენილი სასამართლო სხდომაზე, კოპირებულია, რის გამოც დაცვის მხარემ პოლიციელთა დაკითხვა მოითხოვა.

„ახსნა-განმარტება ჰქონდათ ჩამორთმეული დაახლოებით 20 პოლიციელს და ყველა ახსნა-განმარტებაში ეწერა, რომ აღნიშნული მოქალაქეები მოქმედებდნენ ქაოსურად და ორგანიზებულად. ეს ფრაზა იყო ოცივე ახსნა განმარტებაში. შესაბამისად, ჩვენ მოსამართლეს ვუთხარით, რომ ეს იყო კოპირებული ახსნა-განმარტებები, არ იყო ეს რეალური ახსნა-განმარტებები და მოვითხოვეთ ყველა ამ პოლიციელის დაკითხვა სასამართლოზე, რაც მოსამართლემ დააკმაყოფილა,“ - განაცხადა ადვოკატმა გოგა ონიანმა.

ერთ-ერთი დაკავებული გიორგი რუხაია აცხადებს, რომ ბრალდების მხარემ მისი დამკავებელი პოლიციელი შეცვალა.

„დაკავების ფაქტები არსებობს, მე მანქანაში როგორ მსვამენ. ეს ჩვეულებრივად ტელევიზიითაც გაშუქდა, მაგრამ მას შემდეგ რა ჩაიდინეს ჩემს მიმართ პოლიციელებმა, იმაზე არავინ არ ლაპარაკობს იმიტომ, რომ ის პოლიციელი გადამალეს. ჩემს დამკავებლად ხან ერთის გაფორმება უნდოდათ ხან მეორის და ისიც არ ვიცი, ვინ არის ჩემს დამკავებლად გაფორმებული დღეს,“ - აცხადებს თბილისის მერიასთან აქციის დროს დაკავებული გიორგი რუხაია.

„ნაციონალური მოძრაობის“ წევრები და მხარდამჭერები 2 ოქტომბერს თბილისის მერიასთან მიმდინარე აქციაზე დააკავეს.