იქნებ ირაკლი მამალაძეს ჩაუვარდა ეს ყველაფერი ხელში - რამიშვილი "ციანიდის საქმის" სასამართლო ჩანაწერებზე

სამართალი - 14:50, 12 Oct, 2017

3303

"ის რაც პროკურატურას აინტერესებს, თუ საიდან გასაჯაროვდა სასამართლო პროცესების ამსახველი მასალები, ადვოკატებმა არ იციან" - ამის შესახებ „ნიუპოსტს“ ე.წ. ციანიდის საქმეზე მსჯავრდებული დეკანოზის ადვოკატმა მიხეილ რამიშვილმა განუცხადა.

უფლებადამცველი ამბობს, რომ დახურულ სასამართლო პროცესს, ადვოკატების გარდა კიდევ სხვა არაერთი ადამიანი ესწრებოდა.

„არსებობს მოსამართლე, მდივანი, ტექნიკური სამსახური, რომელიც ახორციელებს სასამართლო პროცესების დროს მოწმეების დაკითხვის ჩაწერას, ასევე არსებობს პროკურატურა და ძალიან ბევრი დაინტერესებული პირი. ჩემდა გასაკვირად მთავარი მოწმე, ირაკლი მამალაძე წინასწარ აჟღერებდა თუ რა მოქმედებები მიმდინარეობდა პროკურატურაში, რა საქმეზე რა გამოძიება მიდიოდა. უკეთესი იქნება ირაკლი მამალაძეც დაკითხონ, იქნებ ირაკლის ჩაუვარდა ეს ყვეალფერი ხელში”- განაცხადა რამიშვილმა.

კითხვაზე რამდენად შესაძლებელია ჩანაწერები პროკურატურის წარმომადგენელთა მხრიდან იყოს გადაცემული ჟურნალისტებისთვის, ადვოკატმა განაცხადა, რომ თეორიულად „ყველაფერი შესაძლებელია“.

„ბრალს ვერავის დავდებ, გინდა თუ არა იმან მიაწოდათქო, შეუძლებელი არაფერია. შემიძლია ერთადერთი ვთქვა, სასამართლოს იცით რა შეიძლება შემოუტრიალდეს? - ჩვენებები, რომელიც აბსოლუტურად სხვა რეალობაა, მის საფუძველზე მოსამართლეს გამამართლებელი განაჩენი გამოეტანა. ეს შემოუბრუნდება მოსამართლეს“- განმარტა მიხეილ რამიშვილმა.

ადვოკატი აცხადებს, რომ პროკურატურამ შესაძლოა სასამართლოს მიმართოს და უფლებადამცველების დაკითხვა მოითხოვოს, თუმცა ისინი ჩვენებას არ მისცემენ.

„მაგისტრი მოსამართლის წინაშე დაკითხვა არ ნიშნავს იმას, რომ იქ ჩვენება უნდა მისცეს ვინმემ. ჩვეულებრივად როგორც ჩვენ ჩვენი პოზიცია დავაფიქსირეთ პროკურორის წინაშე, აქაც დავაფიქსირებთ და ჩვენებას არ მივცემთ“- აღნიშნა რამიშვილმა.