ბათუმის საქალაქო სასამართლოში ჩხვირკია-ღოღობერიძის სასამართლო პროცესი მიმდინარეობს

სამართალი - 14:44, 26 Sep, 2017

1405

ბათუმის საქალაქო სასამართლოში ბათუმში 11-12 მარტის მოვლენების ორგანიზებისთვის დაკავებული პირების სასამართლო პროცესი მიმდინარეობს. სასამართლო სხდომა ბრალდებული მერაბ ღოღობერიძის გარეშე განახლდა, ის გუშინ მოსამართლემ მოწმის შეურაცხყოფის გამო პროცესიდან გააძევა. ერაბ ღოღობერიძემ აჭარის პოლიციის დეპარტამენტის ხელმძღვანელს ლაშა გოგნიაშვილს, რომელიც მოწმის სახით იკითხებოდა, მატყუარა უწოდა.

სავარაუდოდ, დღეს აჭარის საპატრულო პოლიციის ყოფილ უფროსს მოუსმენენ. აქციის ღამეს სწორედ კახა ბუხრაძის გადადგომა იყო ერთ-ერთი მოთხოვნა. სწორედ ამის გამო ღოღობერიძის ადვოკატი თვლის, რომ მისი დაცვის ქვეშ მყოფის სასამართლო პროცესზე დასწრება მნიშვნელოვანია:

"არსებითად მნიშვნელოვანია მერაბ ღოღობერიზის მონაწილეობა საქმის განხილვაში. მისი არმონაწილეობა არც ირაკლი ჩხვირკიას საქმისათვის იქნება სახარბიელო. ამიტომ საზოგადოებას კიდევ ნუ გავუასკეცებთ სასამართლოს უსამართლობის შეგრძნებას. ბრალდებულმა უნდა მიღოს საქმის არსებით განხილვაში მონაწილეობა"- განაცხადა ღოღობერიძის ადვოკატმა პაატა შავაძემ.

ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.