მერაბ ღოღობერიძე მოსამართლემ სასამართლო დარბაზიდან გააძევა. ბრალდებულმა აჭარის პოლიციის დეპარტამენტის უფროს სიტყვიერი შეურაცხყოფა მიაყენა და მას მატყუარა უწოდა. სხდომაზე ღოღობერიძეს ჯერ გაფრთხილება მისცეს, მოგვიანებით კი დარბაზი დაატოვებინეს.

ბათუმის საქალაქო სასამართლოში აჭარის პოლიციის დეპარტამენტის უფროსი, 11-12 მარტის მოვლენებთან დაკავშირებით პირველად დაიკითხა. ლაშა გოგნიაშვილის თქმით მერაბ ღოღობერიძე მას ემუქრებოდა, თუ ხალხს გზის გადაკეტვაში ხელს შეუშლიდნენ, აგრესია მასზე წამოვიდოდა:

„პლაზას მიმდებარე ტერიტორიაზე ხალხის რაოდენობა იზრდებოდა. ჩემი თანამშრომლები გზის სავალი ნაწილის გათავისუფლებას ცდილობდნენ. ამის შემდეგ მოქალაქეებმა შინაგან საქმეთა სამინისტროს პოლიციის სამმართველოს შენობასთან გადაინაცვლეს. მერაბ ღოღობერიძე შეკრებილებს მოუწოდებდა შენობა შტურმით აეღოთ, შესულიყვნენ შენობაში და დაკავებული მოქალაქეები ძალის გამოყენებით გაეთავისუფლებინათ. მერაბი აგრესიულობით გამოირჩეოდა. მას ჩვენმა თანამშრომლებმა შენობაში შეჭრის საშუალება არ მისცეს.“ - განაცხადა სასამართლოზე გოგნიაშვილმა.

„ეს არის მატყუარა და შესაბამისად მატყუარა ადამიანებს კანონი გამოუტანს განაჩენს“- განაცხადა ღოღობერიძემ დარბაზიდან გაძევების დროს.

მოწმის ჩვენებაში არსებულ უზუსტობებს გაუსვა ხაზი, ამავე საქმეზე ბრალდებულმა ირაკლი ჩხვირკიამაც:

„ყველა მანქანა დამწვარია 5-ის ნახევრამდე, უკანასკნელი მანქანა, რომელიც იწვის ჩემი ინტერვიუს ფონზეა. როგორ ახსნით ამ ფაქტს, რომ შვიდივე მანქანის დაწვის შესახებ ინფორმაცია 5-ის ნახევრამდე არის შემოსული, იმ დრომდე, როდესაც თქვენ ამბობთ, რომ ჩემი მოწოდების შემდეგ დაიწვა. მე კი ინტერვიუ მაქვს მიცემული დაახლოებით 5-ს რომ აკლდა 10 წუთი“- განაცხადა ირაკლი ჩხვირკვიამ.