"იქ ჩემი არცერთი თანამშრომელი არ იმყოფებოდა"- რას აცხადებს "26 მაისის საქმეზე" დაკავებული ლევან ქარდავა

სამართალი - 18:31, 25 Sep, 2017

2530

კუდ-ის ყოფილი მაღალჩინოსნები მათ დაკავებას პოლიტიკურ მოტივს უკავშირებენ, ლევან ქარდავამ და ვასილ ლილუაშვილმა ამის შესახებ „26 მაისის საქმის“ სასამართლო სხდომაზე ისაუბრეს.
საქმის არსებითი განხილვა საწყის ეტაპზეა, დღევანდელ სხდომაზე მხარეები შესავალი სიტყვით წარსდგნენ . ბრალდების მხარის თქმით ყოფილი მაღალჩინოსნების ბრძანებით 26 მაისის აქციის მონაწილეები უკანონოდ დააკავეს და მათზე ფიზიკური ზეწოლა განახორციელეს. პროკურატურა სხდომაზე 400-მდე მოწმის წარდგენას აპირებს.
ლევან ქარდავას თქმით 2011 წლის 26 მაისის აქციაზე მომიტინგეების დარბევის ბრძანებას ის არ გასცემდა და კანონსაწინააღმდეგო არაფერი ჩაუდენია:

„პირველი- ჩემი, მე-2 სამმართველოს არცერთი თანამშრომელი არ იმყოფებოდა ადგილზე, შესაბამისად მე სხვას ვერ მივცემდი მითითებას და ბრძანებას, რომ ვინმე ან დაეკავებინათ, ან ეცემათ. მეორე- არ არსებობს ამ 400 კაცში ისეთი ჩვენება, რომ ვინმე მიუთითებდეს ჩემს მიერ ნათქვამ სიტყვებზე, რომ მე ვინმეს ვავალებდი დაკავებას ან ცემას.“- განაცხადა ლევან ქარდავამ.

2011 წლის 26 მაისის საქმეზე ბრალდებულად ცნობილი არიან კუდის ყოფილი დირექტორი დათა ახალაია, მისი მოადგილე ვასილ ლილუაშვილი, ამავე დეპარტამენტის თბილისის სამმართველოს უფროსი რევაზ შიიუკაშვილი და მეორე სამმართველოს უფროსი ლევან ქარდავა.