ჩხვირკია - ღოღობერიძის სასამართლო პროცესი - დღეს მოწმე პოლიციელებს დაკითხავენ

სამართალი - 14:51, 22 Sep, 2017

1658

ბათუმის საქალაქო სასამართლოში 11-12 მარტის აქციების ორგანიზებაში ბრალდებულ ირაკლი ჩხვირკიასა და მერაბ ღოღობერიძის სასამართლო პროცესი მიმდინარეობს. დღეს მოწმეების, 15 პოლიციელის დაკითხვა იგეგმება.

ირაკლი ჩხვირკიამ სახაზინო უფლებადამცველზე უარი თქვა. მის უფლებებს ოჯახის მიერ დაქირავებული ადვოკატი ბადრი ბერიძე დაიცავს. ირაკლი ჩხვირკიას ახალმა ადვოკატმა პროცესის გადადების შესახებ შუამდგომლობა დააყენა, მოსამართლე დავით მამისეიშვილმა კი მოთხოვნა არ დააკმაყოფილა. ბადრი ბერიძის თქმით, ის საქმეს ნაწილობრივ იცნობს და დოკუმენტაციის შესასწავლად დრო მოითხოვა. მოსამართლემ კი განმარტა, რომ უფლებადამცველს ამისთვის საკმარისი დრო ჰქონდა.

სასამართლო პროცესის დაწყებამდე ბრალდებულმა მერაბ ღოღობერიძემ განაცხადა, რომ წინასაარჩევნოდ საკანში სატელევიზიო მაუწყებლობა გათიშეს.

ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.