რატომ არ გაფორმდა პირველი ლედის ძმასთან საპროცესო შეთანხმება

რატომ არ გაფორმდა პირველი ლედის ძმასთან საპროცესო შეთანხმება - პროკურატურის გამარტება

სამართალი - 12:21, 20 Sep, 2017

1850

საქართველოს მთავარი პროკურატურა პირველი ლედის მაკა ჩიჩუას ძმასთან დაკავშირებით ინფორმაციას ავრცელებს და განმარტავს თუ რატომ არ მოხდა მიხეილ მგალობლიშვილთან საპროცესო შეთანხმების გაფორმება.

„მიხეილ მგალობლიშვილი ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვისა და ტარებისთვის ბრალდებული იყო საქართველოს სისხლის სამართლის კოდექსის 236-ე მუხლის მეორე და მესამე ნაწილებით და თბილისის საქალაქო სასამართლომ იგი სრულად სცნო დამნაშავედ. შემდგომ აღნიშნული განაჩენი ძალაში დატოვა სააპელაციო სასამართლომაც. ამჟამად მას 4 წლით თავისუფლების აღკვეთა აქვს მისჯილი. რაც შეეხება კითხვას თუ რატომ არ გაფორმდა საპროცესო შეთანხმება, საქმე მდგომარეობს შემდეგში, მ. მგალობლიშვილი წარსულში არაერთგზისაა ნასამართლევი, მათ შორის ისეთი ძალადობრივი დანაშაულისთვის როგორიცაა განზრახ მკვლელობის მცდელობა დამამძიმებელ გარემოებებში.

გარდა აღნიშნულისა მიხეილ მგალობლიშვილი სასამართლო განხილვებისას აცხადებდა, რომ იარაღები იყო გარდაცვლილი მამის დანატოვარი და წარმოადგენდა რელიქვიას, თუმცა გამოძიებით დადგინდა, რომ იგი მართლსაწინააღმდეგოდ ატარებდა “BROWNING“-ის კონსტრუქციის იარაღს ერთი მჭიდით და ერთი ვაზნით, ასევე თავის საცხოვრებელ სახლში ინახავდა ქარხნული წესით დამზადებულ 7,65 მმ კალიბრის იარაღს -„BERETTA“. ბალისტიკური ექსპერტიზის დასკვნით დადგინდა, რომ ამოღებული იარაღები მიეკუთვნება ცეცხლსასროლ იარაღთა კატეგორიას და ვარგისია სროლისთვის, ხოლო ამოღებული ვაზნა წარმოადგენს საბრძოლო მასალას და ვარგისია გამოსაყენებლად. ზემოაღნიშნული გარემოებებიდან გამომდინარე პროკურატურა ასეთ შემთხვევაში მიზანშეუწონლად მიიჩნევს ბრალდებულთან საპროცესო შეთანხმების გაფორმებას.“- აღნიშნულია უწყების განცხადებაში.

საქართველოს პირველი ლედის მაკა ჩიჩუას ძმა მიხეილ მგალობლიშვილი 2017 წლის იანვარში დააკავეს, მას ბრალად ცეცხლსასროლი იარაღის მართლსაწინააღმდეგო შეძენა-შენახვა-ტარება ედებოდა. თუმცა დაკავებული აცხადებდა, რომ იარაღი რელიქვიას წარმოადგენდა და მის გარდაცვლილ მამას ეკუთვნოდა.