აფგან მუხთარლის ცოლის შესაძლო თვალთვალს ვიძიებთ

აფგან მუხთარლის ცოლის შესაძლო თვალთვალს ვიძიებთ - პროკურატურა

სამართალი - 16:04, 19 Sep, 2017

1228

აფგან მუხტარლის ოჯახმა დღეს ფოტო და ვიდეომასალას გაასაჯაროვა, სადაც, მათი თქმით, თვალთვალია ასახული. ლეილა მუსტაფაევა პრემიერ-მინისტრს და ძალოვან უწყებებს მიმართავს მომხდარზე დაჩქარდეს გამოძიება.

როგორც ოჯახის ადვოკატმა განაცხადა, მასალები უკვე ერთი თვეა პროკურატურას გადასცეს რეაგირება კი არ მოჰყოლია.

საგამოძიებო ორგანოში კი აღნიშნავენ, რომ ფოტო და ვიდეო მასალაში დაფიქსირებული პირების იდენტიფიცირების მიზნით ყველა შესაბამისი საგამოძიებო და ოპერატიულ-სამძებრო ღონისძიება ტარდება.

“როგორც საზოგადოებისთვის ცნობილია, საქართველოს მთავარი პროკურატურის საგამოძიებო ნაწილში მიმდინარეობს გამოძიება სისხლის სამართლის საქმეზე, აფგან მუხთარლის თავისუფლების უკანონო აღკვეთის შესაძლო ფაქტზე, საქართველოს სისხლის სამართლის კოდექსის 143-ე მუხლის პირველი ნაწილით გათვალისწინებული დანაშაულის ნიშნებით. მიმდინარე გამოძიების ფარგლებში, მოწმე ლეილა მუსტაფაევას მიერ საგამოძიებო უწყებაში წარმოდგენილი იქნა მისი და მისი მეუღლის მიმართ სავარაუდო თვალთვალის განმახორცილებელი პირების ფოტოსურათები და ვიდეო კადრები. წარმოდგენილ ფოტო და ვიდეო მასალაში დაფიქსირებული პირების იდენტიფიცირების მიზნით საქართველოს პროკურატურის მიერ ინტენსიურ რეჟიმში ტარდება ყველა შესაბამისი საგამოძიებო და ოპერატიულ-სამძებრო ღონისძიება, აღნიშნულ გარემოებებთან დაკავშირებით მოწმის სახით გამოკითხული იქნენ ლ. მუსტაფაევა და აფგან მუხტარლის მეგობარი დ. ა., ხსენებული პირების ფოტოები დაეგზავნა ყველა შესაბამის უწყებას და ოპერატიულ დანაყოფს, გამოძიების მიერ ამოღებული იქნა ლ. მუსტაფაევას მიერ მითითებულ პერიოდებსა და ადგილებში გარე მეთვალყურეობის კამერების ვიდეო ჩანაწერები, რომელთა დამუშავება და დეტალური შესწავლა მიმდინარეობს. გარდა ამისა, აღნიშნული მიმართულებით დაგეგმილია არაერთი საგამოძიებო და ოპერატიული ღონისძიებების, ასევე საექსპერტო კვლევების ჩატარება. მიღებული შედეგების შესახებ დამატებით ეცნობება ა. მუხთარლის ოჯახის წევრებს, ადვოკატებსა და საზოგადოებას”, - აცხადებენ პროკურატურაში.