"მაქვს მტკიცებულებები, მოწმე პროკურატურის ზეწოლაზე საუბრობდა" - ფირცხალავას მეუღლე "კორტების საქმის" მოწმესთან კომუნიკაციას ადასტურებს

სამართალი - 15:16, 08 Sep, 2017

2074

ე.წ. კორტების საქმეზე ბარლდებული ყოფილი მაღალჩინოსანის ირაკლი ფირცხალავას მეუღლე ადასტურებს, რომ საქმის მოწმესთან კობა გოგატიშვილთან კომუნიკაცია ჰქონდა, თუმცა ნინო ხვიტია აღნიშნავს, რომ მოწმეს 31 აგვისტოს, გოგატიშვილის ინიციატივით შეხვდა.

„კომუნიკაციას ვადასტურებ, რა კომუნიკაციაც მქონდა დეტალურად, ვისაუბრებ გასაჯაროების პროცესში. მისი ნებაა, რა უნდა თქვას კობა გოგატიშვილმა, რომელიც არის მატყუარა, ცრუ მოწმე და დამნაშავე იმიტომ, რომ მისცა სრულიად დანაშაულებრივი და ტყუილი ჩვენება სასამართლოს. მან სასამართლოზე დაიფიცა და მისცა ტყუილი ჩვენება. იმის მერე კობა გოგატიშვილი რას იტყვის, მაგას არ აქვს გადამწყვეტი მნიშვნელობა. იმიტომ, რომ მე მაქვს მტკიცებულებები, რომლითაც დავადასტურებ რა ტიპის შეხვედრა იყო ჩვენს შორის, ვისგან იყო ინიცირებული, რა იყო და როგორ იყო ყველაფერი,“ - განაცხადა ნინო ხვიტიამ.

აღსანიშნავია, რომ პროკურატურამ მოწმის წერილობითი განცხადების საფუძველზე, გამოძიებას აწარმოებს ჯერ კიდევ 2017 წლის 08 თებერვლიდან, თუმცა როგორც ფირცხალავას მეუღლე აცხადებს, ის ამ დრომდე არავის დაუკითხავს.

პროკურატურაში იმყოფება ე.წ. კორტების საქმეზე ბარლედბული პირების ადვოკატიც.

„როგორც მითხრეს, უკავშირდება მოწმეზე მოსყიდვას თუ ზეწოლას, რაც შეეხება თვითონ ფაქტს, მათ არ დაუსახელებიათ, მაგრამ ჩვენ გარკვეული პერიოდიდან გამომდინარე ვიცით ეს მოწმე. ეს სავარაუდოდ არის კობა გოგატიშვილი და ისიც ვიცით, რასაც უკავშირდება. ეს არის პირიქით, რეალურად ვიღაცამ მასზე განახორციელა ზეწოლა და ის ჩვენება მივიღეთ, რაც მან სასამართლოზე მისცა და როცა ამ ადამიანმა ახლა სიმართლე განაცხადა, ცდილობენ, რომ ეს ყველაფერი ამით გარკვეულწილად გადაფარონ,“ - აცხადებს ადვოკატი მალხაზ ველიჯანაშვილი.

მთავარ საგამოძიებო ორგანოსთან იმყოფება ე.წ. კორტების საქმეზე დაკავებული გიორგი ცააძის დის ირინა ცააძეც.

მისი თქმით, საქმის ერთ-ერთი მთავარი მოწმე კობა გოგატიშვილი ირაკლი ფირცხალავას მეუღლეს დაუკავშირდა და პროკურატურის მხრიდან განხორციელებულ ზეწოლაზე ისაუბრა.

მისივე განცხადებით, მათ აქვთ შემდგარი საუბრის დამადასტურებელი ფაქტები, რომელსაც ხვალ გაასაჯაროებენ.

„მოვუყევით რაც მოხდა, ამის გასაჯაროება ჯერ არ გვინდოდა, მაგრამ როგორც ვატყობთ გაიგეს, გვისმენენ ისევ და დაგვასწრეს უბრალოდ. ეს ინფორმაცია გააჟღერეს წინასწარ. ერთ-ერთი მოწმე ე.წ. კორტების სპეცოპერაციის, გამოვიდა კონტაქტზე ნინოსთან და მოუყვა რაღაც რაღაცეები, რისი გასაჯაროებაც გვინდა ხვალ. ზეწოლაზე იყო საუბარი, პროკურატურა ახდენდა ზეწოლას,“ - ამბობს ირინა ცააძე.