ე.წ. კორტების სპეცოპერაციის საქმე - ადვოკატები მოწმეზე ზეწოლის, მუქარისა და მოსყიდვის მცდელობაზე საუბრობენ

სამართალი - 11:56, 08 Sep, 2017

2063

ე.წ. კორტების საქმესთან დაკავშირებით მსჯავრდებული პირები მოწმეების დაშინებას და მოსყიდვას ცდილობენ - ეს სკანდალური განცხადება დღეს გარდაცვლილი ზურაბ ვაზაგაშვილის ოჯახის ადვოკატებმა გააკეთეს.

გაგი მოსიაშვილმა განაცხადა, რომ მათთან ოფისში მივიდა ერთ-ერთი მოწმე, რომელმაც განაცხადა, რომ საქმეზე მსჯავრდებულის ოჯახის წევრები მას დაუკავშირდნენ და კონკრეტული თანხის სანაცვლოდ გამოძიების ეტაპზე და სასამართლოში მიცემული ჩვენების შეცვლა შესთავაზეს.

ადვოკატი ამ ეტაპზე არ ასახელებს იმ მსჯავრდებული პირის ვინაობას, ვის შესახებაც მოწმემ მათ ინფორმაცია მიაწოდა, თუმცა აცხადებს, რომ მოწმის მიერ გაჟღერებული ინფორმაცია, მათ ვიდეოფირზე დააფიქსირეს, რომელსაც დღეს მთავარ პროკურატურას გადაუგზავნიან და გამოძიებას მოითხოვენ.

„ჩვენთან ოფისში მოვიდა ადამიანი, რომელმაც განაცხადა, რომ კორტების სპეცოპერაციის საქმეზე ერთ-ერთი მსჯავრდებულის ოჯახი დაუკავშირდა და გარკვეული თანხის სანაცვლოდ გამოძიების ეტაპზე და სასამართლოში მიცემული ჩვენების შეცვლა მოსთხოვა. საუბარია ერთ-ერთ მსჯავრდებულზე, რომლის მიმართაც ორი ინსტანციის სასამართლოში გამამატყუნებელი განაჩენი გამოტანილია. ამ მოწმის მიერ მოწოდებული ინფორმაცია ჩვენ დავაფიქსირეთ ვიდეოფირზე, რა თქმა უნდა, მისი თანხმობის შესაბამისად. აღნიშნულ ჩანაწერს და განცხადებას, გამოძიების დაწყების მოთხოვნით, ჩვენ დღეს შევიტანთ პროკურატურაში. ვიმედოვნებთ, რომ პროკურატურა სწრაფად მოახდენს რეაგირებას აღნიშნულ განცხადებაზე“, - განაცხადა გაგი მოსიაშვილმა.

ვაზაგაშვილების ოჯახის კიდევ ერთი ადვოკატის, მერაბ ჩიქოვანის განცხადებით, მოწმეს მასზე განხორციელებული სავარაუდო ზეწოლისა და შესაძლო მოსყიდვის დამადასტურებელი არავითარი მტკიცებულება მათთვის არ წარუდგენია.

„რაც შეეხება იმას, თუ რამდენად შეიძლებოდა გავლენა ექონია მისი ჩვენების შეცვლას საქმეზე, ამ საქმეზე სასამართლოს ორ ინსტანციაში მოსმენა დასრულებულია და შესაბამისად, განაჩენიც დამდგარია, მაგრამ საპროცესო კანონმდებლობა იცნობს ახლად გამოვლენილ გარემოებას. თუკი ეს გარემოება საფუძველს იძლევა, შესაძლოა, დღის წესრიგში დადგეს განაჩენის გადასინჯვის აუცილებლობა“, - განაცხადა მერაბ ჩიქოვანმა.

ე.წ. კორტების საქმეზე სასჯელს რამდენიმე ყოფილი მაღალჩინოსანი იხდის. საქმე უზენაეს სასამართლოშია.
ვაზაგაშვილების ოჯახის ადვოკატებმა ვიდეო მასალა, სადაც მოწმე მასზე განხორციელებულ ზეწოლაზე საუბრობს შოთაძის უწყებას უკვე გადასცეს.