როგორც "ნიუპოსტს" ბრალდებული სასულიერო პირის ადვოკატმა მიხეილ რამიშვილმა განუცხადა, დეკანოზი "ციანიდის საქმის" დეტალებზე, საპატრიარქოს არსებულ შიდა დაპირისპირებაზე, შორენა თეთრუაშვილის ფაქტორსა და "ბევრ საინტერესო" დეტალზე ისაუბრებს.

რამიშვილის თქმით, სამართლიანი სასამართლოს პირობებში უმძიმესი დანაშაულის მომზადებაში ბრალდებული პირი აუცილებლად გამართლდება.

"თუ საქართველოში დამოუკიდებელი, სამართლიანი მართლმსაჯულება არსებობს, იმ მტკიცებულებების ფონზე, რაც სახელმწიფო ბრალდებამ წარმოადგინა, დასკვნითი სიტყვის საფუძველზე, რაც ჩვენ გვექნება წარმოდგენილი მოსამართლემ გამამართლებელი განაჩენი უნდა მიიღოს. დასკვნით და მე ვიტყოდი არასაბოლოო სიტყვას იტყვის თავად მამა გიორგი მამალაძეც. მას წერილში დეტალურად აქვს განხილული ყველა ის გარემოება, რისი მსხვერპლიც შეიძლება ის ყოფილიყო. სიტყვაში ის მის მიმართ არსებულ დამოკიდებულებაზე ისაუბრებს, რომ შორენა თეთრუაშვილი ვერანაირად იქნებოდა ხელისშემშლელი ფიგურანტი წინსვლაში. იტყვის, რომ ეს არის აბსურდი და გარკვეული პირების ინტერესებია ამ ყველაფრის უკან"- განაცხადა ბრალდებულის ადვოკატმა.

მიხეილ რამიშვილის თქმით, სასულიერო პირი დღევანდელ სიტყვაში კონკრეტულ სახელებზე ისაუბრებს.

"მისი მხრიდან ამავდროულად საუბარი იქნება თუ რა ინტერესი ჰქონდა სახელმწიფო ბრალდებას და რა ინფორმაციას ითხოვდნენ მისგან და რაც გარკვეულ სასულიერო პირებს ეხება, რაზეც მისი (დეკანოზის) მხრიდან უარი იყო ნათქვამი. მოგეხსენებათ ეკლესია და საპატრიარქო საჯარო სამსახური არ არის და იქ მოძღვრები ერთმანეთის საიდუმლოებებს ფლობენ. მათ (ბრალდების მხარეს) რა უნდა ეს მეორე საკითხია, მაშინ გამოდის რომ ჩვენი ეკლესია დამოუკიდებელი არ ყოფილა"- განმარტა მიხეილ რამიშვილმა.

უფლებადამცველის თქმით, მამა გიორგი მამალაძოს ექვსივე ადვოკატი დღევანდელ პროცესზე დასკვნით სიტყვას წარმოთქვამს.

„მოსამართლეს დეტალურად მივაწვდით ინფორმაციას და ხაზს გავუსვამთ იმას, რომ წარდგენილი ბრალდება პროკურატურის მტკიცებულებებით ვერ დასტურდება. საქმის მასალებიდან ჩანს, რომ ეს შეთითხნილი საქმეა"- აცხადებს ბრალდებულის ადვოკატი.

ბრალდებულის ოჯახის წევრები იმედოვნებენ, რომ დღეს საუკუნის საქმის მოსამართლეები გამოცდას ჩააბარებენ და პროკურატურის ზეწოლას გაუძლებენ.

დეკანოზის ძმა, თორნიკე მამალაძე „ნიუპოსტთან“ ამბობს, რომ ”თუ საქართველოში სამართლიანობა არსებობს, მამა გიორგი მამალაძე აუცილებლად უნდა გამართლდეს“.

„იმედია მოსამართლე პროკურატურის ზეწოლას გაუძლებს და ჩემი ძმა, მამა გიორგი მამალაძე შეძლებს სიმართლის დამტკიცებას. პროგნოზის გაკეთება მიჭირს, თუმცა თუ საქართველოში მართლმსაჯულება არსებობს მამაომ საბყრობილე უნდა დატოვოს“- განაცხადა მამალაძემ.

შეგახსენებთ, რომ სასულიერო პირი, დეკანოზი გიორგი მამალაძე მკვლელობის მომზადების ბრალდებით 2017 წლის 10 თებერვალს დააკავეს.

დეკანოზი თბილისის საერთაშორისო აეროპორტში ბრალდებულის სახით აიყვანეს. პროკურატურის მტკიცებით, ჩხრეკისას დეკანოზის ბარგიდან შხამიანი ნივთიერება -„ნატრიუმის ციანიდი“ ამოიღეს.

თბილისის აეროპორტში მის დაკავებას კატეგორიულად უარყოფს ბრალდებული. სასამართლოზე დეკანოზმა მამალაძემ აღნიშნა, რომ მისი დაკავება აეროპორტში არ მომხდარა.

მეტიც, მამალაძემ სასამართლოს წინაშე განაცხადა, რომ დაკავებისას მას ხან პატრიარქის მკვლელობის აღარებას, ხანაც სხვა სასულიერო პირის მკვლელობის მცდელობას სთხოვდნენ.

გენერალურმა პროკურორმა ირაკლი შოთაძემ 13 თებერვალს სპეციალურ ბრიფინგზე განაცხადა: “მოქალაქის თქმით, გიორგი მამალაძეს სჭირდებოდა ციანიდი, რათა “მოეხდინა მაღალი იერარქიის სასულიერო პირის სიცოცხლის ხელყოფა".

27 აპრილს კი საქმეზე პროკურატურამ თქვა, რომ დეკანოზ გიორგი მამალაძეს ბრალი დაუმძიმდა. პროკურატურაში აცხადებენ, რომ ექსპერტიზის დასკვნებით დადგინდა, რომ გიორგი მამალაძის ბარგიდან ამოღებული ნივთიერება ნატრიუმის ციანიდი საკმარისი იყო რამდენიმე ადამიანის სიცოცხლის მოსასპობად. უწყების ცნობითვე, მამა გიორგი მამალაძე შორენა თეთრუაშვილის მკვლელობას გეგმავდა.

ყველაზე სკანდალური საქმის დასკვნითი სხდომა, რომელიც თბილისის საქამაქო სასამართლოში დღეს 11:00 საათზე დაიწყება მედიისთვის დახურული იქნება.