საკრებულოს დეპუტატი სასამართლომ წინასწარ პატიმრობაში დატოვა

სამართალი - 21:45, 27 Aug, 2017

2603

საკრებულოს დეპუტატ ზურაბ ნეფარიძეს სასამართლომ აღკვეთის ღონისძიების სახით წინასწარი პატიმრობა შეუფარდა. დაკავებული თავს დამნაშავედ არ ცნობს.

პროკურატურის მტკიცებით, საკრებულოს დეპუტატი ბიუროს თანამშრომელს, დალი მამულაშვილს ხელფასიდან ყოველთვიურად 400 ლარს სძალავდა და მას სამსახურიდან წასვლას აიძულებდა, ამიტომ, გამოძიება ნეფარიძეს შრომის კოდექსის დარღვევასაც ედავება.

სასამართლომ წინასწარ პატიმრობაში დატოვა ამავე საქმეზე ბრალდებული, დეპუტატის ბიუროს თანამშრომელი ანა მენთეშაშვილიც, რომელიც ბრალდების მხარის მტკიცებით, ნეფარიძეს ქრთამის აღებაში ეხმარებოდა.

სასამართლო პროცესიდან ცნობილი ხდება, რომ ნავთლუღის მაჟორიტარი დეპუტატი, ზურაბ ნეფარიძე მისივე ბიუროს თანამშრომლის გარდა, შვილის ჩვენების საფუძველზე დააკავეს. ბრალდების მხარის განცხადებით, დეპუტატის შვილი პროკურატურამ თანამშრომლობისთვის გაათავისუფლა.

ანტიკორუფციულმა სააგენტომ, ქრთამის აღების ბრალდებით, ნავთლუღის მაჟორიტარი 25 აგვისტოს მისსავე ბიუროში დააკავა. აღსანიშნავია, რომ ნეფარიძე კორუფციის ბრალდებით ერთხელ უკვე იყო დაკავებული და „ქართული ოცნების“ ხელისუფლებაში მოსვლის შემდეგ, პოლიტპატიმრის სტატუსით გაათავისუფლეს.