თვალთვალი მუხთარლის ოჯახზე - ლეილა მუსტაფაევა პროკურატურას ფოტო- აუდიომოსალას ოფიციალურად გადასცემს

სამართალი - 12:47, 24 Aug, 2017

1334

აზერბაიჯანელი ჟურნალისტის აფგან მუხთარლის მეუღლე და ადვოკატი მთავარ პროკურატურაში იმყოფებიან. ლეილა მუსტაფაევა საგამოძიებო უწყებისტვის იმ ფოტო და აუდიომასალის გადაცემას აპირებს, რომელიც მათი თქმით ასახავს თვალთვალს, რომელიც მათ ოჯახზე ხორციელდებოდა აფგან მუხთარლის დაკავებამდე და მას შემდეგ. ადვოკატ არჩილ ჩოფიკაშვილის განცხადებით, საჯარო სივრცეში ვრცელდება კონკრეტული სახელები და გვარები, ასევე ვიდეოჩანაწერი, სადაც მოთვალთავლე ადამიანები საინფორმაციო გამოშვების კადრებში ფიგურირებენ. ლეილა მუსტაფაევას თქმით, პირი რომელიც მას უთვალთვალებდა იგივე პიროვნება იყო, რომელიც აფგან მუხთარლის გატაცებაში საქმეში ფიგურირებდა.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, ოჯახის და ადვოკატის მიერ გავრცელებული ინფორმაციით, ის თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.