დავით ხარშილაძის საქმეზე განაჩენი 20 სექტემბერს გამოცხადდება

სამართალი - 15:34, 17 Aug, 2017

1592

“ქრონიკა+“-ის მთავარი რედაქტორის შვილის დავით ხარშილაძის საქმეზე განაჩენი 20 სექტემბერს გამოცხადდება. დღეს სასამართლო პროცესზე ადვოკატების დასკვნითი სიტყვა მოისმინეს, ბრალდებულისა და პროკურორების დასკვნითი სიტყვის მოსმენა კი 20 სექტემბერს მოხდება.

დავით ხარშილაძე ეჭვობს რომ აღნიშნულ საქმეზე სასამართო პოლიტიკურ გადაწყვეტილებას ელოდება:

„ტაქტიკურ თამაშს ჰგავს ხელისუფლების მხრიდან. რა თქმა უნდა, ხელისუფლების არცერთ შტოს არ უნდა ამ ჩადებების გამართლება და თავის თავზე აღება. ამიტომ იდება ეს საქმეები, თორემ მარტივად შეიძლებოდა 2 სიტყვაში ჩემი ბოლო სიტყვის თქმა. ისედაც იმდენი გვისაუბრია მე და ქალბატონ მოსამართლეს ამ საქმესთან დაკავშირებით, რომ ბევრი სასაუბრო არაფერი არ არის, ყველამ ყველაფერი ძალიან კარგად იცის და ელოდებიან რაღაც პოლიტიკურ გადაწყვეტილებებს,“ - განაცხადა დავით ხარშილაძემ.

ელისო კილაძე აცხადებს, რომ საბოლოო განაჩენის გამოსატანად სასამართლო პროცესი თვითმმართველობის არჩევნების თარიღთან საეჭვოდ ახლოს დაინიშნა.

„სავარაუდოდ ორი რამეა - ან ხელისუფლება სამაგალითოდ შეეცდება, რომ დასაჯოს ყველა ის ადამიანი, ვისაც აქვს კრიტიკული და განსხვავებული პოზიცია, ან წინასაარჩევნოდ ჩაიწეროს ქულები და გამამართლებელი განაჩენი გამოიტანოს იმის დასტურად, რომ ქვეყანაში არის დემოკრატია და სასამართლო არის თავისუფალი. ბუნებრივია, ამდენი ხნით, 1 თვეზე მეტით გადაიდო პროცესი. ბრალდებულის სიტყვა დარჩა მხოლოდ მოსასმენი და როგორც მოსამართლემ თქვა, სწორედ ამ დღეს, სავარაუდოდ, არსებითი განხილვაც დასრულდება,“ - განაცხადა ელისო კილაძემ.