დღეს „მოძრაობა თეთრი ხმაურის“ წევრის ბექა წიქარიშვილის საქმეზე თბილისის საქალაქო სასამართლო საბოლოო გადაწყვეტილებას გამოიტანს. მანამდე ბრალდებული სასამართლოს წინაშე დასკვნითი სიტყვით წარსდგება.

ბექა წიქარიშვილი 2013 წლის მაისში, 69 გრ მარიხუანას პირადი მოხმარების მიზნით ფლობისთვის დააკავეს. გირაოს საფუძველზე გათავისუფლებულ ბრალდებულს კანონის ძველი რედაქციით 7-დან 14 წლამდე თავისუფლების აღკვეთა ემუქრებოდა. საქალაქო სასამართლოს პარალელურად, 2014 წლის მაისში, საკონსტიტუციო სასამართლოში დარეგისტრირდა კონსტიტუციური სარჩელი “ბექა წიქარიშვილი პარლამენტის წინააღმდეგ”, სადაც, მოსარჩელე იმ ნორმის კონსტიტუციასთან შეუსაბამობაზე დავობდა, რომელიც 70 გრ-მდე მარიხუანას პირადი მოხმარების მიზნით ფლობისთვის 7-დან 14 წლამდე პატიმრობას ითვალისწინებდა. ბექას სარჩელზე 2015 წლის 24 ოქტომბერს საქართველოს საკონსტიტუციო სასამართლომ პრეცენდენტული გადაწყვეტილება გამოიტანა და აღნიშნული ქმედებისთვის თავისუფლების აღკვეთა არაკონსტიტუციურად ცნო. საკონსტიტუციო სასამართლოს გადაწყვეტილება პარლამენტმა კანონში მიმდინარე წლის 26 ივლისს ასახა. ახალი რედაქციით, 5 გრ-დან 70 გრ-მდე მარიხუანას პირადი მოხმარების მიზნით ფლობისთვის პატიმრობა აღარ გამოიყენება, თუმცა ქმედება კვლავაც რჩება სისხლის სამართლის დანაშაულად და სანქციად ჯარიმას, ან საზოგადოებისთვის სასარგებლო შრომას, ვადით 160-დან 220 სთ-მდე ითვალისწინებს.