გარდაცვლილი ბექა ხახუბიას დევნაში მონაწილე პოლიციელები გირაოს სანაცვლოდ გათავისუფლდნენ

სამართალი - 15:01, 11 Aug, 2017

11081

ფოთის მაჟორიტარი დეპუტატის, ირაკლი ხახუბიას შვილის ავტოსაგზაო შემთხვევევის საქმეზე ბრალდებული საპატრულო პოლიციის სამი თანამშრომელი 1000 ლარიანი გირაოს სანაცვლოდ გაათავისფლეს.

სასამართლომ სამივე პატრულ-ინსპექტორს უფლება-მოსილების შესრულებაც შეუჩერა.

პროკურატურა აცხადებდა, რომ პოლიციელთა თანამდებობებიდან გამომდინარე არსებობდა საფრთხე, რომ მათ ზემოქმედება მოეხდინათ საქმის მოწმეებზე, რაც საბოლოოდ მოსამართლემ გაითვალისწინა კიდეც.

აღსანიშნავია, რომ სამი ბრალდებულიდან ერთ-ერთს, რომელიც ათმეთაური იყო, მას საპატრულო პოლიციის დეპარტამენტის ხელმძღვანელობის გადაწყვეტილებით უფლება-მოსილება შემთხვევიდან მალევე შეუჩერდა.
პროკურატურა პოლიცილებისთვის აღკვეთის ღონისძიების სახით გირაოს შეფარდებას და მათი სამსახურიდან ჩამოცილებას ითხოვს.

ბრალდებულის ადვოკატების განცხადებით, პოლიციის თანამშრომლები თავს დამნაშავედ არ გრძნობენ და აცხადებენ, რომ მათ დევნის ოპერაციას კანონის სრული დაცვით ახორციელებდნენ.

„თუ ეს პირი განაგრძობდა მოძრაობას, მის მიმართ შეწყდებოდა ეს ღონისძიებები და არ აღიკვეთებოდა მისი საქმიანობა. სავარაუდოდ, დიდი ალბათობით, არ იყო გამორიცხული, რომ ავტომაგისტრალზე მოძრავ სხვა პირთა სიცოცხლეს და ჯანმრთელობას შექმნოდა გარკვეული საფრთხე... გზის ეს გადაკეტვა და ეს ღონისძიება მიზნად არ ისახავდა კონკრეტული პირის მიმართ რაიმე დაზიანების მიყენებასაც. მიზანი იყო, შეეჩერებინათ ეს ავტომობილი,“ - აცხადებს ნოდარ ცინცაძე.

პროკურორის განცხადებით პასუხისგებაში მიცემულთაგან ერთ-ერთია ის პირი ვინც უშუალო ბრძანება გასცა.

„საქმეში არსებული მტკიცებულებების საფუძველზე სამ პირს წარედგინა ბრალდება, მათ შორის, ერთ-ერთი პიროვნება არის ის, ვინც გასცა აღნიშნული მითითება, ხელმძღვანელი, ათმეთაური,“ - აცხადებს გიორგი ლეკიშვილი.

საქმის არსებითი განხილვა გორის რაიონის სასამართლოში 2 ოქტომბრიდან დაიწყება. მათ ბრალი ორი მუხლით აქვთ წარდგენილი, თანამდებობრივი უფლებამოსილების გადამეტება და გაუფრთხილებლობით სიცოცხლის მოსპობა.

16-17 მაისს გორის გვირაბთან მომხდარი ავარიის შედეგად, ქართული ოცნების დეპუტატის, ირაკლი ხახუბიას 21 წლის შვილის სიცოცხლე შეეწირა. გავრცელებული ინფორმაციით, ბექა ხახუბია საპატრულო პოლიციის დევნის ოპერაციისას დაიღუპა.