ე.წ. ციანიდის საქმეში ბრალდებულ დეკანოზ გიორგი მამალაძის ადვოკატი ამბობს, რომ პირი თუ აგენტია, მისი მონაცემები არ არის აუცილებელი იყოს ბაზაში.

გიორგი ფანცულაიამ პროკურორი გუბელაძე შეთანხმების დარღვევაში დაადანაშაულა.

მისი თქმით, სასამართლომ დაავალდებულა ორივე მხარე, რომ ეს არის სახელმწიფო საიდუმლოება და ამ თემაზე კომენტარი არ გაგვეკეთებინა, თუმცა რამდენიმე წუთში გამოდიან პროკურორები და საუბრობენ.

„ეს არის ორმაგი სტანდარტი. იმედი მაქვს, რომ სასამართლო და შესაბამისი ორგანოები რეაგირებას მოახდენენ, ასევე იმედი მაქვს, რომ პროკურატურა იცნობს იმ კანონს, რომლითაც უსაფრთხოების კუთხით საქმიანობა განისაზღვრება, რომლის მე-4 მუხლში პირდაპირ არის განსაზღვრული, რომ პირი თუ აგენტია, არ არის აუცილებელი, მისი მონაცემები იყოს ბაზაში”, - განაცხადა გიორგი ფანცულაიამ.

პროკურორ ზვიად გუბელაძის ინფორმაციით, მოსამართლემ ბრალდების მხარის მტკიცებულებად ის ინფორმაცია დაამტკიცა, რომლის მიხედვითაც დასტურდება, რომ ირაკლი მამალაძე არასდროს ყოფილა სახელმწიფო უსაფრთხოების სამსახურის საიდუმლო თანამშრომელი.