"ბავშვთა სამყაროს" დირექტორი გირაოს სანაცვლოდ გაათავისუფლეს

სამართალი - 20:07, 28 Jul, 2017

1764

"ბავშვთა სამყაროს" დირექტორი გიორგი მაჭავარიანი საქალაქო სასამართლომ გირაოს სანაცვლოდ გაათავისუფლა. სასამართლომ მაჭავარიანს 50 ათას ლარიანი გირაო შეუფარდა. მასთან ერთად გაათავისუფლეს "ბავშვთა სამყაროს" კიდევ ერთი თანამშრომელი მალხაზ თევზაძე, რომელსაც გირაოს სახით 10 ათასი ლარის გადახდა დაეკისრა. ბრალდების მხარე აცხადებს, რომ გასაჩივრებაზე გადაწყვეტილებას უახლოეს მომავალში მიიღებს.
"ბავშვთა სამყაროს" დირექტორის დაკავება სახანძრო უსაფრთხოების წესის დარღვევის , ხოლო უსაფრთხოების სამსახურის თანამშრომლის სამსახურებრივი გულგრილობის ფაქტზე მოხდა. ბრალდების მხარის თქმით სახანძრო უსაფრთხოების წესების დარღვევისა და სამსახურებრივად პასუხისმგებელი პირის გულგრილობის გამო, სახანძრო-სამაშველო სამსახურის ადეკვატური რაოდენობის ძალებისთვის შეუძლებელი აღმოჩნდა ხანძრის ლოკალიზება „ბაზრობა ნიუ მოლი“-ს სრული ფართობის ნაწილში და ჩაქრობა. შედეგად, ხანძარი გავრცელდა „ბაზრობა ნიუ მოლი“-ს მთელ ტერიტორიასა და სავაჭრო ცენტრ „ბავშვთა სამყაროს“ შენობაში, რამაც ხსენებული შენობების, მათში არსებული სარეალიზაციო საქონლისა და ინვენტარის განადგურება გამოიწვია.