"პატრიარქის გარდაცვალებამდე შორენა გაგიჟდება..." - ე.წ. ციანიდის საქმის დეტალები და ადვოკატების განცხადება

სამართალი - 16:21, 28 Jul, 2017

16595

საქალაქო სასამართლოში ე.წ. ციანიდის საქმეზე პროცესი მიმდინარეობს. პროკურორმა ჟურნალისტებთან სკანდალური განცხადება გააკეთა და აღნიშნა, რომ 10 ტომიანი წერილობითი მტკიცებულებების შესწავლის შემდეგ დასტურდება, რომ ბრალდებულმა ნამდვილად მოამზადა შორენა თეთრუაშვილის მკვლელობა.

ზვიად გუბელაძის განცხადებას ბრალდებული დეკანოზის ადვოკატებმა უკვე უპასუხეს. გიორგი ფანცულაია ამბობს, რომ ვერანაირად ვერ დასტურდება რომ გიორგი მამალაძეს ვინმემ ციანიდი გადასცა.

პაატა მეხრიშვილი კი აღნიშნავს, რომ "დღეს განხილული მტკიცებულებები იყო ჩვეულებრივი მაკულატურა - მას ის ფასიც კი არ აქვს, რაზეც არის დაბეჭდილი".

"ერთადერთი ფრაზა, რომელზეც არის დაყრდნობილი ბრალდება არის ის, როცა გიორგი მამალაძე ამბობს, შორენა უნდა გავუშვათ მარილზეო. ამაში მამა გიორგი გულისხმობდა შორენას გაგიჟებას, რაც მას ბერი გაბრიელის წინასწარმეტყველებაში უწერია. თუ ბრალდება ამ მტკიცებულებაზე დაყრდნობით ვარაუდობს გამამტყუნებელ განაჩენს, ეს არის სასაცილო და სახალისო", - განაცხადა მეხრიშვილმა.

ადვოკატის თქმით, ბრალდების მხარემ დღევანდელ პროცესზე უკვე გავრცელებული ვიდეო-ჩანაწერის სტენოგრამა წარადგინა, რომელშიც დეკანოზი გიორგი მამალაძე ირაკლი მამალაძეს შორენა თეთრუაშვილის მარილზე გაშვების კონტექსტში ეუბნება, რომ "პატრიარქის გარდაცვალებამდე შორენა გაგიჟდება, მას ბერი გაბრიელის წინასწარმეტყველება აქვს, საპატრიარქოს ”კრუგებს” დაარტყამს და შიგნით არ შეუშვებენ".