ოხანაშვილი შავშიშვილი და მამალაძე თეთრუაშვილის ჩამოცილებას ცდილობდნენ

ოხანაშვილი შავშიშვილი და მამალაძე თეთრუაშვილის ჩამოცილებას ცდილობდნენ - პროკურორი

სამართალი - 17:18, 25 Jul, 2017

4916

ე.წ. ციანიდის საქმის პროკურორის, ჯარჯი წიკლაურის თქმით, პატრიარქის დაცვის ყოფილი ხელმძღვანელმა, სოსო ოხანაშვილმა დაკითხვის დროს ვერ დამალა სიძულვილი და მტრული დამოკიდებულება შორენა თეთრუაშვილის მიმართ.

პროკურორის განცხადებით, "ოხანაშვილი ეცადა, რომ ბრალდებულისთვის რაღაც გარემოებები შეენიღბა, თითქოს დეკანოზს არ ჰქონდა ცუდი ურთიერთობა თეთრუაშვილთან“.

„თუმცა ვერ უარყო ის ფაქტი, რომ სიძულვილი და მტრულად განწყობილი იყვნენ შორენას მიმართ. უფრო მეტიც, იმართებოდა შეხვედრები, სადაც კონსპირაციულად სოსო ოხანაშვილი, ბრალდებული მამალაძე და ტარას შავშიშვილი განიხილავდნენ შორენა თეთრუაშვილის ჩამოშორების საკითხს საპატრიარქოდან. მას ადარებდნენ კიბოს მეტასტაზს, რომელიც იყო მოსაშორებელი. აი, ამ ეპითეტს ხმარობდნენ თეთრუაშვილის მიმართ და ყველანაირი გზით ცდილობდნენ მის ჩამოშორებას. როგორც სასამართლო განხილვებით დადასტურდა, როდესაც მიზანს ვერ მიაღწია ბრალდებულმა მან ყველაზე რადიკალური მეთოდი აირჩია და დაიწყო მზაობა თეთრუაშვილის მკვლელობისთვის. სწორედ ამ მიზნით შეიძინა მან ციანიდი და დანაშაულებრივ განზრახვის სისრულის მოყვანა გერმანიაში გადაწყვიტა. სოსო ოხანაშვილმა თქვა, რომ არაერთხელ იყო თხოვნა პატრიარქთან, რომ როგორმე იქნებ ჩამოეშორებინათ შორენა საპატრიარქოდან და თანამდებობიდან", - განაცხადა პროკურორმა.

წიკლაურის თქმით, ამ ეტაპზე არც თავად სოსო ოხანაშვილის და არც სხვა პირების ბრალეულობა არ იკვეთება.