ვარდების მოედნის მიმდებარე ტერიტორიაზე, ჯავახიშვილის ქუჩაზე პოლიციამ ახალგაზრდა მამაკაცი დააკავა. სამართალდამცავებმა მამაკაცი ნარკოტიკების უკანონო შეძენა-შენახვისთვის გაჩხრიკეს და დააკავეს.

დაკავებული მეგობრები კანონდარღვევაზე საუბრობენ და აცხადებენ, რომ ახალგაზრდა, რომელიც ბარში მოპედით მივიდა, პოლიციელებმა ის გადმოაგდეს და დააპატიმრეს.

მომხდარს მცირე დაპირისპირება მოჰყა პოლიციასა და რამდენიმე ადამიანს შორის. დაკავებულის მეგობრები ამტკიცებენ, რომ პოლიციას ნარკოტიკული ნივთიერების ჩადება სურდა. მათ თქმით, ახალგარზდას პოლიციამ მხოლოდ საძილე საშუალება ,,ქსანაქსი“ აღმოუჩინა.

დაკავებული ახალგაზრდა მამაკაცი, ამ დრომდე დიღომში, თბილისის პოლიციის მთავარი სამმართველოს წინასწარი დაკავების იზოლატორში რჩება. ადვოკატი აცხადებს, რომ ჩხრეკისას დაკავებულს ნარკოტიკული საშუალება არ ჰქონია, გიორგი მახარაძის თქმით, ამას ექსპერტიზაც დაადასტურებს. ადვოკატი ამბობს, რომ პრეპარატი, რომელიც მისი დაცვის ქვეშ მყოფს სამართალდამცავებმა ამოუღეს, თავისუფალ ბრუნვაშია და ის აფთიაქებში ურეცეპტოდ იყიდება.

შსს-ს ინფორმაციით, ახალგაზრდა სისხლის სამართლის კოდექსის 260-ე მუხლის პირველი ნაწილის შესაბამისად გაჩხრიკეს, რაც გულისხმობს ნარკოტიკული საშუალების ან მისი ანალოგის დამზადებას, წარმოებას, შეძენას, შენახვას, გადაზიდვას ან გადაგზავნას.