გიორგი გიორგანაშვილის საქმე - მოწმეს ჩხრეკისას ნარკოტიკის ამოღება არ დაუნახავს

სამართალი - 13:10, 14 Jul, 2017

2908

თბილისის საქალაქო სასამართლოში გიორგი გიორგანაშვილის, „ბახალას“ პროცესი მიმდინარეობს. სასამართლო პროცესზე დღეს რამდენიმე მოწმე დაიკითხა. ბრალდების მხარის მოწმის თქმით, ის გაემგზავრა თურქეთში, სადაც მას მსახიობმა ნარკოტიკული საშუალება გადასცა. ამის შემდეგ მან დატოვა თურქეთი, თბილისში შემოსვლისას კი, ის სამართალდამცავებმა დააკავეს, რის შემდეგაც მან დაასახელა გიორგი გიორგანაშვილი როგორც ნარკოტიკული ნივთიერების გადმომცემი პირი.

დღეს ასევე დაიკითხა ის ტაქსის მძღოლი, რომლის ავტომობილითაც მგზავრობდა გიორგი გიორგანაშვილი დაკავებამდე. ტაქსის მძღოლის თქმით პირები, რომლებმაც მისი ავტომობილი და ავტომობილში მსხდომები გაჩხრიკეს პოლიციის ფორმებში არ იყვნენ, ტაქსის მძღოლის თქმით უშუალოდ მას არ დაუნახავს ნარკოტიკული საშუალება ამოიღეს თუ არა გიორგი გიორგანაშვილის ჯიბიდან

„სამი მანქანა უკნიდან მომადგა, გადმოვიდნენ, პოლიციის ფორმაში არ იყვნენ. მაჩვენეს საბუთი, რომ უნდა ჩამტარებოდა ჩხრეკა. გადმოვედი მანქანიდან, მითხრეს გაქვთ ისეთი ნივთი, რომ შეგამოწმოთო. მე ვუთხარი, რომ არაფერი არ მაქვს და სუფთა ვარ. მე და გიორგი გიორგანაშვილი ერთად ვიჩხრიკებოდით. მერე ჩემი მანქანა იჩხრიკებოდა. მერე ატყდა რაღაც, რომ აი ნახე სადაა და რომ გავიხედე, თეთრ პარკში იყო რაღაც აბები. ზუსტად არ ვიცი რამდენი იყო და რა იყო“- განაცხადა მოწმემ, მისი თქმით მას არ დაუნახავს ნარკოტიკული საშუალება ამოიღეს თუ არა გიორგი გიორგანაშვილის ჯიბიდან.

ადვოკატი გიორგი მახარაძის განცხადებით დაცვის მხარე გიორგი გიორგანაშვილის გირაოთი გათავისუფლების შუამდგომლობას დააყენებს:

„დაიკითხებიან მოწმეები, რომელთაც პროკურატურა წარმოადგენს, მათი ვინაობა ჩვენთვის წინასწარ ცნობილი არაა. ასევე შუამდგომლობას დავაყენებთ აღკვეთის ღონისძიების შეცვლას და გირაოთი გათავისუფლებას, იმედი გვაქვს რომ სასამართლო გაიზიარებს, ვინაიდან ჩვენი შუამდგომლობა აბსოლუტურად არგუმენტირებულია. დიდი იმედი გვაქვს, რომ დღეს გიორგი დატოვებს საპატიმრო დაწესებულებას“- განაცხადა ადვოკატმა.

გიორგი გიორგანაშვილი რამდენიმე თვის წინ სისხლის სამართლის კოდექსის 260-ე მუხლის მე-6 ნაწილის "ა" პუნქტი, ნარკოტიკული ნივთიერების განსაკუთრებით შემცველობის დიდი ოდენობით შეძენა-შენახვისათვის დააკავეს. მას თავისუფლების აღკვეთა 8-დან 20 წლამდე ან უვადოდ ემუქრება.