"საპატრიარქოს იურისტი და პროკურატურა ერთმანეთს ასწრებდნენ დეკანოზის დისკრედიტაციას"- ფანცულაია

სამართალი - 20:22, 11 Jul, 2017

2029

დეკანოზ გიორგი მამალაძის ადვოკატმა გიორგი ფანცულაია აცხადებს, რომ დღევანდელ პროცესზე ხან საპატრიარქოს იურისტი და ხან პროკურატურა პერიოდულად ერთმანეთს ასწრებენ, თუ ვინ მოახდენდა სასულიერო პირის დისკრედიტაციას.

რაც შეეხება დეკანოზის შპს-ში დასაქმებას, ადვოკატმა პროკურორის ამ განცხადებას სიცრუე უწოდა.

"პროკურორებმა გააჟღერეს ცრუ ინფორმაცია, რომელიც ემსახურება დეკანოზის დისკრედიტაციას. განაცხადეს, რომ დეკანოზი გიორგი მამალაძე იყო სხვადასხვა შპს-ის მამაო. ეს არის სიცრუე და ასეთი რამ არც ერთ მოწმეს არ უთქვამს. პერიოდულად ერთმანეთს ასწრებენ ხან საპატრიარქოს იურისტი და ხან პროკურატურა იმას, თუ ვინ მოახდენს დეკანოზის დისკრედიტაციას", - განაცხადა ფანცულაიამ.

გარდა ამისა მისი თქმით, გამომძიებლების დაკითხვისას "გამომძიებლების მხრიდან ნებსით თუ უნებლიედ წამოცდომები იყო".

"დაკავებისა და პირადი ჩხრეკის ოქმში დაფიქსირებულია რომ ჩხრეკა ჩატარდა აეროპორტში, თუმცა ჩვენს კითხვაზე, თუ სად მოხდა ჩხრეკა, განაცხადეს, რომ სამარშუტო ტაქსში, რომლითაც დეკანოზი გადაიყვანეს პროკურატურაში. რაც შეეხება ბარგის ჩხრეკას, როცა გაიხსნა ბარგი, რატომღაც ფოტო მხოლოდ იმ ერთ ნივთს აქვს გადაღებული, რომელშიც ვითომდა შემდეგ პროკურატურამ აღმოაჩინა ე.წ. ციანიდი. როცა ჩვენ ვკითხეთ, თუ რატომ გადაუღეს მხოლოდ ამ ნივთს ფოტო, გამომძიებელმა გვითხრა, რომ ამ ნივთში იყო მოთავსებული ციანიდი და ამის გამო. რა იცოდა გამომძიებელმა წინასწარ, სად იდო ციანიდი?! ასევე, ფოტოზე ჩანს, რომ ლუქი და პოლიეთილენის პარკი გახეულია, რომელშიც მოთავსებული იყო დეკანოზის ბარგი. თავდაპირველად გამომძიებელი უარყოფდა ლუქისა და პოლიეთილენის პარკის მთლიანობის დარღვევას, თუმცა სურათის ჩვენების შემდეგ გამოსავალი იპოვეს და განაცხადეს, რომ პარკი მას შემდეგ გახიეს, როცა ციანიდი ამოიღეს. იყო არაერთი მწვავე კითხვა დასმული, რაშიც ისინი იჭრებოდნენ, ნებსით თუ უნებლიედ სიმართლეს ლაპარაკობდნენ, ამას ყველაფერს მოსამართლე ისმენდა და შემდეგ შეაფასებს კიდეც", - აღნიშნა ფანცულაიამ.