"ჩხრეკისას სცადა შეუმჩნევლად გადაედო ნივთი, სადაც ნატრიუმის ციანიდს მალავდა"- "ციანიდის საქმეზე" პროცესი 14 ივლისს განახლდება

სამართალი - 19:25, 11 Jul, 2017

5335

ე.წ. ციანიდის საქმეზე სასამართლო პროცესი 14 ივლისს განახლდება. დღევანდელ სხდომა 8 საათი გაგრძელდა და სულ 10 მოწმე დაიკითხა.

პროკურორების თქმით, ბრალდებული სტატუსით იყო დარეგისტრირებული ერთ-ერთ შპს-ში ხელფასს და პრემიებს იღებდა, რაზეც დაცვის მხარემ განაცხადა, რომ მსგავსი ტიპის სტატუსი არ არსებობს.

გარდა ამისა, როგორც ჟურნალისტებს საქმის პროკურორმა განუცხადა, „ბრალდებულმა გიორგი მამალაძემ ბარგის ჩხრეკისას სცადა შეუმჩნევლად გადაედო გვერდზე ის ნივთი, სადაც ნატრიუმის ციანიდს მალავდა“.

ზვიად გუბელაძის თქმით, დღევანდელი სასამართლო პროცესზე გამომძიებლებმა გაიხსენეს, რომ ბრალდებულმა თავად ამოიღო ტანსაცმლის საწმენდი ნივთი, რომელიც საკუთარი ინიციატივით დაშალა.

„შემდეგ ამოიღო ფეხსაცმლის საწმენდი სპრეი, რომლის გვერდზე გადადებას შეეცადა გაუხსნელად, თუმცა, გამომძიებლების მოთხოვნის შემდეგ მოხადა თავი, საიდანაც გადმოვარდა პოლიეთილენის პარკში გახვეული ნატრიუმის ციანიდი. ამის შემდეგ ბრალდებულმა დამსწრე ადვოკატს განუცხადა, რომ ყველაფერი დამთავრებული იყო და მისი დახმარება არ სჭირდებოდა. რამდენიმე წუთის შემდეგ კი ადვოკატთან გაიარა კონსულტაცია და მხოლოდ საგამოძიებო მოქმედების დასრულების შემდეგ მოიფიქრა, თითქოსდა ეს ნივთიერება მისი არ იყო. მანამდე არავითარი განცხადება აღნიშნულთან დაკავშირებოთ არ გაუკეთებია", - განაცხადა ბრალდების მხარის წარმმადგენელმა.